QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda óńirlerdiń aldaǵy kúzgi-qysqy kezeńge daiyndyǵy talqylandy, dep habarlaidy "Ult aqparat".
Óńirler 10662 avtonomdy qazandyq nemese 98,6%, 46561 turǵyn úi (97%) daiyndady. 5 024 km jylý jelisi (99,1%), 14 089 km sýmen jabdyqtaý jelileri (99,1%) jóndeldi. Jylytý maýsymyna 11 158 (99,6%) bilim berý nysany jáne 5 963 (99,2%) densaýlyq saqtaý nysany daiyndaldy. Kómir óndirýshi kompaniialar 69 mln tonna kómir óndirdi.
Kommýnaldyq qyzmetter úshin tutynýshylardyń bereshegi 17 mlrd teńgeni quraidy. Eń joǵary debitorlyq bereshek Almaty qalasynda – 4,5 mlrd teńge, Nur-Sultan qalasynda – 1,95 mlrd teńge, Shymkent qalasynda – 2,5 mlrd teńge jáne Mańǵystaý oblysynda – 1,4 mlrd teńge saqtalýda.
«Kún raiynyń qolaisyzdyǵyna bailanysty jylytý maýsymy kóptegen aimaqtarda erterek bastalyp ketti. Jalpy, óńirlerdiń ákimderi turǵyn úi-kommýnaldyq sharýashylyq, bilim berý, áleýmettik salalardy, jylý jáne energiia obektilerin jylytý maýsymyna daiyndaý boiynsha jaqsy jumys júrgizdi», — dedi Mamin.
Aqmola, Qaraǵandy, Qostanai, Pavlodar, Soltústik Qazaqstan oblystarynyń jáne Almaty qalasynyń ákimdikteri áleýmettik sala obektileri men turǵyn úilerdi jylytý maýsymyna daiyndaý josparyn 100% oryndady.
Aqmola, Almaty, Shyǵys Qazaqstan, Batys Qazaqstan, Qostanai, Pavlodar, Soltústik Qazaqstan oblystary men Almaty qalasy avtonomdy qazandyqtar úshin kómir daiyndaý jónindegi josparly kórsetkishterdi aiaqtady.
Batys Qazaqstan oblysynda turǵyn úilerdi daiyndaý kestesinen artta qalý faktileri bar (61,7%). Aqmola (kommýnaldyq-turmystyq qajettilikter úshin 48% jáne halyq úshin 61%), Aqtóbe (90,3% jáne 51%), Qaraǵandy (83% jáne 53%), Soltústik Qazaqstan (80% jáne 70%), Pavlodar (halyq úshin 67%) oblystarynda jáne Nur-Sultan qalasynda (halyq úshin nebári 40%) kommýnaldyq qajettilikter men halyq úshin otyn daiyndaý deńgeii jetkiliksiz.
Úkimet basshysy ákimderge belgilengen merzimderde barlyq josparlanǵan jóndeý jumystaryn jáne qajetti kólemde otyn jetkizýdi aiaqtaýdy, sondai-aq energiia óndiretin jáne energiia jetkizetin uiymdarmen birlesip, jylytý maýsymyn júrgizýge daiyndyq pasporttaryn tez arada alýdy qamtamasyz etýdi tapsyrdy.
«Bizde óndiriletin kómirdiń kólemi jetkilikti, sondyqtan kómirmen qiyndyqtar týyndamaýy kerek», — dedi Mamin.
Premer-Ministr óńirlerdiń ákimderine eki apta merzimde belgilengen tártippen kómir daiyndaý jáne satý pýnktteriniń infraqurylymynyń qazirgi jaǵdaiyn, jetkizý kestesin, baǵalardyń negizdiligi men satylatyn kómirdiń sapasyn tekserýdi, sondai-aq Indýstriia jáne infraqurylymdyq damý ministrligine «Qazaqstan temir joly» UK» AQ-men birlesip, kómir jetkizý úshin vagondardyń jetkilikti bolýyn qamtamasyz etýdi tapsyrdy.
«Óńirlerde kásiporyndardyń jetkizilgen gaz ben kómir úshin jáne tutynýshylardyń kommýnaldyq qyzmetter úshin debitorlyq bereshegin óteý jónindegi jumystar kúsheitilsin», — dedi Premer-Ministr.
A. Mamin energetika, indýstriia jáne infraqurylymdyq damý ministrlikterine óńirler ákimdikteriniń barlyq obektilerdi jylytý maýsymyna daiyndaý jumystaryn aiaqtaýyn baqylaýǵa alyp, monitoring júrgizýdi qamtamasyz etýdi tapsyrdy.
Aita keteiik, jylytý maýsymyna daiyndyq boiynsha atqarylyp jatqan jumys týraly energetika ministri N. Noǵaev, indýstriia jáne infraqurylymdyq damý ministri B. Atamqulov, bilim jáne ǵylym ministri A. Aimaǵambetov, densaýlyq saqtaý ministri A. Tsoi, Batys Qazaqstan oblysynyń ákimi Ǵ. Isqaliev, Qaraǵandy oblysynyń ákimi J. Qasymbek, Aqmola oblysynyń ákimi E. Marjyqpaev, Nur-Sultan qalasynyń ákimi A. Kólginov, sondai-aq Premer-Ministrdiń orynbasary R. Skliar baiandady.
