Premer-Ministrdiń orynbasary Gúlshara Ábdiqalyqova bastaǵan Úkimet músheleri qaraǵandylyqtarmen áleýmettik jáne eńbek daýlaryn aldyn alý máselelerin talqylady, dep habarlaidy "Ult aqparat".
Qaraǵandy óńirine jumys sapary barysynda Gúlshara Ábdiqalyqova oblys ákimdiginde áleýmettik áriptestik pen áleýmettik jáne eńbek qatynastaryn retteý jónindegi respýblikalyq úshjaqty komissiianyń otyrysyn ótkizdi.
«Eńbek daýyn týyndatatyn basty alǵysharttardyń biri jalaqy deńgeiiniń naqty eńbek jaǵdailary men aǵymdaǵy ekonomikalyq ahýalǵa sáikes kelmeýi bolyp tabylady», - dedi kezdesýge qatysýshylar.
«Búgingi basty mindet - eńbek daýlarynyń aldyn alý. Barlyq áleýmettik shielenister eńbek daýynyń nátijesinde týyndaidy. Olardyń sebebi - jalaqy boiynsha bereshekter men jumys ornynyń qysuarýy. Qaýipsiz eńbek jaǵdailaryn jasaý úshin respýblikalyq Jol kartasy ázirlendi. Óńirlerde osyndai kartalardy qurý qajet. Biznestiń áleýmettik jaýapkershiligi boiynsha jumysty da jalǵastyrý kerek», - dedi QR Eńbek jáne halyqty áleýmettik qorǵaý ministri Berdibek Saparbaev.
Óz kezinde Qaraǵandy oblysynyń ákimi Erlan Qoshanov eńbek daýlary boiynsha óńirde oń kórsetkishter baiqalatynyn atap ótti.
«Eger sońǵy 7 jylda oblysta 10 eńbek daýy týyndasa, 2018 jyly birde - bir kelispeýshilik tirkelmegen. Biz bul baǵytta turaqty monitoring júrgizýdemiz. Kún saiyn áleýmettik shielenis oshaqtarynyń kartasy jańartylyp, qadaǵalanady. Osy kartaǵa sáikes, biylǵy jyly bizdiń oblysta bul máselege qatysty oń ózgerister baiqalyp otyr. Bul der kezinde problemaǵa den qoiý jáne eńbek daýlaryn sheshý boiynsha sharalar qabyldaý nátijesinde qol jetkizip otyrǵan jetistigimiz», - dedi Erlan Qoshanov.
Óńir basshysy táýekelderdi basqarý júiesin engizý týraly da toqtala ketti. Atalmysh júie aiasynda árbir shaǵymǵa qatysty kásiporyndarda jedel túrde sharalar qoldanylady. Sonymen qatar, oblysta jalaqy boiynsha bereshekke jol bermeý boiynsha memlekettik organdardyń ózara is-qimyl algoritmi ázirlendi.
Ákimniń aitýynsha, oblysta jumys berýshilermen eńbek quqyqtaryn qamtamasyz etý, jumys oryndaryn saqtaý boiynsha 4000-ǵa jýyq memorandýmǵa qol qoiyldy. Birinshi Elbasynyń jalaqyny kóterý týraly bastamasyn oblystyń 39 myń kásiporny qoldady, onda 300 myńǵa jýyq adam eńbek etedi, dep habarlady óńir basshysy.
Oblysta kásipodaqtardyń rólin kúsheitý úshin Tatýlasý ortalyǵy quryldy. Eńbek ujymdarynda tálimgerlik institýty damýda.
Erlan Qoshanov zańnamalyq sheshimdi talap etetin problemalarǵa da nazar aýdardy. Aimaq basshysy qyzmetkerlerdiń quqyǵyn qorǵaý úshin aýtstaffing institýtyn retteý kerek dep esepteidi.
«Búgingi kúni áleýmettik áriptestik salasyndaǵy negizgi mindetterdiń biri áleýmettik eńbek janjaldarynyń týyndaýynyń aldyn alýy bolýy tiis. Áleýmettik áriptestiktiń barlyq qatysýshylaryna óńirlerdegi áleýmettik shielenisti monitoringileý, jalaqy boiynsha bereshekterdi boldyrmaý, óndiristik jaraqattanýdy tómendetý máselelerin erekshe baqylaýǵa alý qajet. Kórip otyrǵanyńyzdai, biz respýblikalyq úshjaqty komissiianyń jumys formatyn ózgertemiz. Jáne óńirlerden osyndai belsendi jumys kútemiz. Osynyń barlyǵy jai ǵana qaǵaz júzinde qalyp qoimaýy tiis», - dedi Gúlshara Ábdiqalyqova.
Vitse-premer áleýmettik áriptestiktiń barlyq nysandaryn damytýǵa, salalyq kelisimder men ujymdyq sharttar boiynsha mindettemelerdi oryndaý boiynsha jaýapkershilikti kúsheitýge shaqyrdy.
