Qazaqstan Úkimeti Internette teris syrtqy makroekonomikalyq jaǵdailarǵa bailanysty týyndaityn problemalar týraly habarlamalardyń jiileýine bailanysty málimdeme jasady, - dep habarlaidy "Ult aqparat".
Teris syrtqy ekonomikalyq qubylystarǵa jedel den qoiý sheńberinde Úkimet pen Ulttyq bank birlesken is-qimyldar josparyn iske asyryp jatqany habarlandy.
"Atap aitqanda, qarjy naryǵynyń ornyqtylyǵyn jáne teńgelik depozitterdiń tartymdylyǵyn qamtamasyz etý maqsatynda Úkimet Ulttyq bankpen birlesip, memlekettik biýdjet esebinen halyqtyń depozitteri boiynsha syilyqaqy esepteýdi kózdeitin Teńgelik salymdardy qorǵaý baǵdarlamasyn ázirledi.
Ekinshi deńgeidegi bankterde 2022 jylǵy 12 naýryzdaǵy jaǵdai boiynsha shamamen 15,3 trillion teńge nemese aktivterdiń 40 paiyz ótimdiligi joǵary aktivterdiń birshama qory bar", - delingen habarlamada.
Erkin ótimdiliktiń bolýy bankterge óz mindettemelerine ýaqtyly jáne tolyq kólemde qyzmet kórsetýge múmkindik beredi. Bankterdiń ótimdilik boiynsha prýdentsiialyq normativteri retteýshiniń eń tómengi talaptarynan tórt eseden astam artyq.
Zańda belgilengen shekte jeke tulǵalardyń depozitterine memleket kepildik beretini aityldy.
"Biyl qańtarda halyqtyń teńgelik jinaq depozitteri boiynsha kepildik somasy 20 million teńgege deiin, sondai-aq túrleri men valiýta boiynsha ártúrli depozitterge kepildik berýdiń eń joǵary jiyntyq somasy "Qazaqstannyń depozitterge kepildik berý qory" AQ tarapynan ulǵaityldy.
Budan basqa, baǵanyń ósýin tejeý maqsatynda Úkimet Infliatsiiany baqylaý jáne tómendetý boiynsha sharalar keshenin iske asyryp jatyr", - delingen habarlamada.
Ol ónim óndirý kólemin ulǵaitýǵa, saqtaý men logistikaǵa, bólshek saýdaǵa, baǵa belgileýdi baqylaýǵa, monopoliiaǵa qarsy jáne syrtqy saýdany retteýge baǵyttalǵan jedel jáne orta merzimdi sipattaǵy is-sharalardan turady.
Jalpy, Úkimet, Ulttyq bank jáne Qarjy naryǵyn retteý jáne damytý agenttigi jaǵdaidy baqylaýda ustaitynyna sendirdi.
"Bul úshin kún saiyn Daǵdarysqa qarsy sharalar jónindegi jedel shtab otyrystary ótkiziledi. Onyń sheńberinde ekonomikalyq jaǵdaidyń damýynyń ártúrli stsenariileri boiynsha sheshimder pysyqtalady.
Halyqty úreilenbeýge jáne resmi aqparat kózderine ǵana senýge shaqyramyz. Arandatýshylyq sipattaǵy anyq emes jáne jalǵan aqparat taratqany úshin Qazaqstan Respýblikasynyń zańdaryna sáikes jaýapkershilik kózdelgenin atap ótemiz", - delingen resmi habarlamada.
