QR Premer-Ministri Asqar Maminniń tóraǵalyǵymen ótken Úkimet otyrysynda Qazaqstannyń 2021-2025 jyldarǵa arnalǵan áleýmettik-ekonomikalyq damý boljamy, «QR Ulttyq qorynan 2021-2023 jyldarǵa arnalǵan kepildendirilgen transfert týraly», «2021-2023 jyldarǵa arnalǵan respýblikalyq biýdjet týraly» QR zańdarynyń jobalary, sondai-aq «Qazaqstan Respýblikasynyń Ulttyq qorynan 2021 jylǵa arnalǵan nysanaly transfert bólý týraly» QR Prezidenti Jarlyǵynyń jobasy qaraldy.
Jiynda Ulttyq ekonomika ministri Rýslan Dálenov, Ulttyq bank tóraǵasy Erbolat Dosaev, qarjy ministri Erulan Jamaýbaev baiandama jasady, dep habarlaidy primeminister.kz saity.
Fitch reitingtik agenttiginiń biylǵy tamyzdaǵy derekterine sáikes Qazaqstannyń investitsiialyq senimdiligi VVV – turaqty. Bul — daǵdarysqa qarsy sharalardy ýaqytynda qabyldap, qurylymdyq reformalardy tabysty júrgizýdiń nátijesi. Sondai-aq el ekonomikasynyń turaqtylyǵyn, memlekettik qaryzdyń tómendigin, Ulttyq bank júrgizetin aqsha-nesie saiasatynyń tiimdiligin jáne fiskaldyq rezervterdiń edáýir kólemin kórsetedi. Buǵan deiin Fitch agenttigi elderdiń 60%-dan astamynyń, onyń ishinde AQSh, Kanada, Japoniia, Ulybritaniia, Frantsiia, Italiia jáne t. b. elderdiń kredittik reitingteri men boljamdaryn teris baǵytta qarastyrdy.
Qazaqstannyń 2021-2025 jyldarǵa arnalǵan áleýmettik-ekonomikalyq damý boljamyna sáikes, boljanatyn kezeńge JIÓ-niń ortasha jyldyq ósý qarqyny 4%-dy quraidy. Ataýly JIÓ 2021 jyly 76,7 trln teńgeden 2025 jyly 104,8 trln teńgege deiin ósedi.
Ulttyq bank jyldyq infliatsiianyń nysanaly dálizin 2021 jyly 4-6% sheginde saqtap, keiinnen 2025 jyly 3-5%-ǵa deiin tómendetýdi boljaidy.
2021 jylǵa arnalǵan respýblikalyq biýdjette shyǵystardyń jańa bastamalary kózdelgen, onyń ishinde jalaqyny arttyrý arqyly pedagog pen meditsina qyzmetkerleriniń mártebesin arttyrý, MÁMS-ke memleket jarnalary, orta bilim berý uiymdarynda jan basyna qarjylandyrý, halyqty sapaly aýyz sýmen qamtamasyz etý, jergilikti mańyzy bar joldardy damytý, gazdandyrý, jastar men kóp balaly otbasylardy turǵyn úimen qamtamasyz etý bar.
«Qazir ekonomika salalaryn qoldaý jónindegi josparlanǵan sharalardy sapaly iske asyrýymyz kerek, úilesimdi ári jedel sheshimder qabyldaýymyz qajet. Qazirgi jaǵdaidy eskere otyryp, alǵa qoiylǵan maqsattarǵa qol jetkizý úshin el biýdjetiniń jobasy qalyptastyryldy. Onda qarastyrylǵan qarajat memlekettiń barlyq áleýmettik mindettemelerin tolyq kólemde oryndaýǵa múmkindik beredi», — dedi A. Mamin.
Úkimet basshysy Parlamentke atalǵan zań jobalary men áleýmettik-ekonomikalyq damý boljamyn belgilengen merzimde engizýdi qamtamasyz etýdi tapsyrdy.
