Búgin Úkimet múddeli memlekettik organdarmen jáne uiymdarmen birlesip, Qazaqstannyń qoi ósirýshiler Ulttyq qaýymdastyǵynyń tóraǵasy Almasbek Sadyrbaevtyń tiri usaq maldyń eksportyna tolyq tyiym salý týraly usynysyn qarady, dep habarlaidy "Ult aqparat" AShM baspasóz qyzmetine silteme jasap.
QR Strategiialyq josparlaý jáne reformalar agenttiginiń Ulttyq statistika biýrosynyń derekteri boiynsha aǵymdaǵy jyldyń basynda usaq mal basy 20,05 mln basty qurady. 2020 jyldyń qorytyndysy boiynsha ósim 902 myń basty (4,7%) qurady, bul sońǵy 10 jyldaǵy eń joǵary kórsetkish.
Aǵymdaǵy jyldyń basynan beri tól esebinen qoi basy 7,1 mln. - ǵa ulǵaidy, osylaisha, aǵymdaǵy jyldyń 1 maýsymyna Qazaqstanda 27,1 mln. usaq mal basy bar.
Aita ketý kerek, jyl saiyn respýblikada 172,4 myń tonna qoi eti óndiriledi. Ishki naryqtyń qamtamasyz etilýi 100,7% - dy quraidy. Aǵymdaǵy jyldyń 4 aiynda Birikken Arab Ámirlikterine, Ózbekstan, Bahrein jáne Resei elderine 538 tonna qoi eti eksporttaldy.
Alaida, qoi sharýashylyǵy salasyndaǵy basqa qoǵamdyq uiymdar qoi eksportyna tyiym salý máselesi fermerlerdiń qarjylyq jaǵdaiyna teris áser etýi múmkin ekenin jetkizip, tyiym salýdý engizbeý jóninde óz ustanymdaryn bildirdi.
Aǵymdaǵy jyly qurǵaq aýa raiy jaǵdaiyna bailanysty ońtústik óńirlerde azyq baǵasynyń ósýi baiqalady.
Shóptiń azdyǵyna bailanysty fermerler úlken aýmaqqa jem jinaýǵa májbúr, bul janar-jaǵarmai shyǵyndaryn jáne jem baǵasyn arttyrady.
Osylaisha, jem-shópti ýaqtyly daiyndaý jáne satyp alý maqsatynda fermerler tólderin jazǵy, kúzgi kezeńderde ótkizýge májbúr bolady.
Sondai-aq, pandemiiaǵa bailanysty eksporttyq naryqtar tolyq qalpyna keltirilmedi. Aviatasymaldaý quny 2 ese ósti. Barlyq óńirlerde artyq qoi etin eksportqa shyǵarýǵa múmkindik beretin zamanaýi sertifikattalǵan et óńdeý kásiporyndary joq.
Fermerler bul qiyn jaǵdaida tiri qoilardyń eksportyna tyiym salý olardyń qarjylyq jaǵdaiyna teris áser etedi dep sanaidy.
Satyp alý baǵasynyń tómen bolýyna bailanysty fermerlerdiń mal basyn kútip-baǵýǵa jumsaǵan shyǵyndary ótelmeidi jáne olar mal basyn ulǵaitýǵa múddeli bolmaidy.
Qazirgi ýaqytta Qazaqstanda aýyl sharýashylyǵy jáne qarjy ministrlikteriniń birlesken buiryǵyna sáikes analyq usaq múiizdi mal basyn shyǵarýǵa tyiym salynǵan.
Buǵan deiin Aýyl sharýashylyǵy ministrligi qoi sharýashylyǵyn damytý úshin arnaiy memlekettik kómek kórsetiletinin habarlaǵan bolatyn.
Asyldandyrý jumystary, asyl tuqymdy mal basyn satyp alý, bordaqylaý alańdaryna nemese etti qaita óńdeý kásiporyndaryna ótkizilgen qoshqarlardyń quny sýbsidiialanady, sondai-aq sharýashylyqtarda jáne aýyl sharýashylyǵy kooperativterinde analyq mal basyn qoldan uryqtandyrý jónindegi qyzmetter sýbsidiialanady.
Taraptardyń pikirlerin eskere otyryp, vedomstvoaralyq komissiia tiri qoilardyń eksportyna tolyq tyiym salý máselesi erterek dep sanaidy.
Talqylaý qorytyndysy boiynsha Aýyl sharýashylyǵy ministrligine aǵymdaǵy jyldyń kúzinde qoi etin óndirý jáne satý sektorynyń teńdestirilýin qamtamasyz etý maqsatynda tiri maldy eksporttaýdy kvotalaý tetigin engizý tapsyryldy.
