Úkimet halyqty jumyspen qamtý salasyna tyń serpin beretin sharalardy oilastyrýy kerek. Mundai pikirdi «Ekonomikalyq zertteýler institýty» AQ strategiialyq ázirlemeler ortalyǵynyń direktory Baqytgúl Qambar bildirdi, dep habarlaidy QazAqparat.
«Qazirgi tańda búkil álemdi jailaǵan pandemiiadan týyndaǵan daǵdarys álemniń kóptegen elderiniń áleýmettik-ekonomikalyq jaǵdaiyndaǵy kemshin tustardy kórsetti. Bul daǵdarystyń elimizdi de ainalyp ótpegeni barlyǵymyzǵa belgili. Álemniń kóptegen eli strategiialyq joldaryn qaita qarastyrý máselesin de talqylap jatyr. Búgingi Úkimettiń keńeitilgen otyrysynda Prezidentimiz Qasym-Jomart Toqaevtyń da pikiri osyǵan kelip saiady. Árine, jyl basynan beri jáne oǵan deiin de atqarylǵan, jaqsy nátije bergen sharalar kóp. Biraq, dál qazir el ekonomikasy úlken syni kezeńmen betpe-bet kelgenin kórip otyrmyz», - dedi Baqytgúl Qambar.
Sarapshy oǵan dálel retinde osy jyldyń basynan elimizdiń ekonomikalyq ósiminiń 1,8 paiyzǵa tómendeýin alǵa tartady.
«Munan bólek, ekonomikalyq turǵyda belsendi halyqtyń jartysynan kóbin jumyspen qamtyp otyrǵan qyzmet kórsetý salasy ósiminiń de jyl basynan beri 5,6 paiyzǵa tómendeýi jumyssyzdyqtyń ary qarai arta túsý qaýpi bar ekenin kórsetedi. Al bul jaittyń el biýdjetine yqpal etetin keri saldary aitpasa da túsinikti jait. Sondyqtan Úkimet halyqty jumyspen qamtý salasynda jańa serpin beretin sharalar oilastyrý kerek dep oilaimyn», - dedi ortalyq basshysy.
Baqytgúl Qambar búgin Memleket basshysyÚkimetke bul baǵytta shuǵyl sharalar qabyldaý kerektigin tapsyrǵanyn jáne aldaǵy ýaqytta jańa Joldaýy jariialaityndyǵyn eskertkenin atap ótedi.
«Jańa Joldaýda ekonomikamyzǵa tyń, jańa serpin beretin naqty bastamalar bolady dep oilaimyn. Bul oraida aldaǵy ýaqytta qolǵa alynatyn sharalarǵa der kezinde monitoring jasap, ár kezeńinde naqty baǵa berý júiesin jetildirýdiń de mańyzy zor bolmaq», - dedi sarapshy.
