QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Farmatsevtika ónerkásibin damytýdyń keshendi jospary qaraldy, dep habarlaidy primeminister.kz saity.
2020 jyldyń 8 aiynyń qorytyndysy boiynsha QR farmatsevtika ónerkásibindegi óndiris kólemi 34,1%-ǵa 81,5 mlrd teńgege deiin, investitsiialar 5,2%-ǵa 4,1 mlrd teńgege deiin ósti. Belgili kompaniialardyń, sonyń ishinde TUK qatysýymen 41 joba iske asyryldy, olardyń ishindegi eń irileri — antibiotikter, alkoloidtar, antiseptikter («Himfarm» AQ, «Nobel AFF» AQ, «Abdi Ibrahim Global Farm» JShS), sondai-aq jeke qorǵanysh quraldary men hirýrgiialyq maqta («Kelun Kazpharma» JShS, «Qaraǵandy farmatsevtikalyq kesheni» JShS, «Dolce» JShS) óndirisi boiynsha jobalar. 5 myńnan astam jumys orny ashyldy. Dári-dármekter men meditsinalyq buiymdardy satyp alýdaǵy otandyq óndirýshilerdiń úlesi 30%-ǵa deiin artty jáne turaqty túrde ósip jatyr (5 myńnan astam ataý boiynsha 88 shart jasaldy).
Dúniejúzilik densaýlyq saqtaý uiymynyń baǵalaýy boiynsha eldiń dárilik qaýipsizdigi menshikti farmatsevtika óndirisi bolǵan jaǵdaida keminde 30% qamtamasyz etiledi, al Qazaqstan 2025 jylǵa qarai óz óndirisin zattai mánde 50%-ǵa deiin jetkizýdi kózdep otyr.
Osylaisha, Farmatsevtikalyq jáne meditsinalyq ónerkásipti damytýdyń 2025 jylǵa deiingi keshendi josparyna sáikes 77,8 mlrd teńgege 30-dan astam jańa iri farmatsevtikalyq óndiris iske qosylady, bul dári-dármek óndirisiniń kólemin 2,5 esege (92-den 230 mlrd teńgege deiin), eksportty 3 esege (25-ten 75 mlrd teńgege deiin) ulǵaitýǵa, 2 myńnan astam joǵary bilikti mamandardy daiarlaýǵa jáne olarǵa arnap turaqty jumys oryndaryn qurýǵa jol ashady.
Úkimet basshysy otandyq farmatsevtika óndirisi úshin, ásirese, klinikalyq jáne klinikaǵa deiingi synaqtardy yntalandyrý turǵysynan memlekettik qoldaý sharalaryn aýqymdy túrde keńeitýdi tapsyrdy.
Indýstriia, densaýlyq saqtaý jáne syrtqy ister ministrlikterine dáriler óndirisin elimizde jergiliktendirýge Big Pharma – Top 50 tiziminen álemdik farmatsevtika óndirýshilerdi targetteý boiynsha usynystar engizý tapsyryldy.
Densaýlyq saqtaý ministrligine uzaq merzimdi kelisimsharttardy iske asyrý tetikterin keńeitý, eldegi dárilik zattardyń qajettiligin naqty josparlaý men aiqyndaýdy qamtamasyz etý, meditsinalyq buiymdar men dári-dármekterge synaqtar júrgizetin zerthanalardyń materialdyq-tehnikalyq bazasyn kúsheitý, Keshendi jospardy iske asyrýdy eskere otyryp, farmatsevtika salasy úshin bilikti kadrlar daiarlaý jóninde sharalar qabyldaý tapsyryldy.
Oblystar men Nur-Sultan, Almaty jáne Shymkent qalalarynyń ákimdikterine jergilikti jerlerde dári-dármekter men meditsinalyq buiymdardy satyp alý kezinde jergilikti qamtý boiynsha nysanaly indikatorlardy (KPI) bekitý tapsyryldy.
«Farmatsevtika ónerkásibi – ekonomikanyń óte mańyzdy sektory jáne halyqtyń ómiri men densaýlyǵy qaýipsizdiginiń negizi», — dedi A. Mamin.
Aita keteiik, jiynda Indýstriia jáne infraqurylymdyq damý ministri B. Atamqulov, densaýlyq saqtaý ministri A. Tsoi, «Himfarm» AQ direktory A. Isenova, «Dolce-pharm» JShS kommertsiialyq direktory B. Demeýova, Qazaqstannyń farmatsevtikalyq jáne meditsinalyq ónimderdi óndirýshiler qaýymdastyǵynyń atqarýshy direktory G. Manaqpaeva baiandama jasady.
