QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda elimizdegi sanitarlyq-epidemiologiialyq ahýal qaraldy, dep habarlaidy "Ult aqparat" primeminister.kz saityna silteme jasap.
Elimizdegi epidemiologiialyq jaǵdai týraly densaýlyq saqtaý ministriniń mindetin atqarýshy L. Aqtaeva, veterinarlyq jáne epizootiialyq ahýal týraly aýyl sharýashylyǵy ministri S. Omarov, biologiialyq qaýipsizdik salasyndaǵy ǵylymi-zertteý qyzmeti týraly bilim jáne ǵylym ministri A. Aimaǵambetov, jeke qorǵaný quraldaryn óndirý týraly indýstriia jáne infraqurylymdyq damý ministri B. Atamqulov, óńirlerdegi ahýal týraly Atyraý oblysynyń ákimi M. Dosmuhambetov, Pavlodar oblysynyń ákimi Á. Sqaqov baiandady.
Biyl ótken jyldyń sáikes kezeńimen salystyrǵanda juqpaly aýrýlardyń 57 túri boiynsha naýqastaný deńgeii tómendedi, onyń ishinde meningitpen aýyrý 3,5 ese, qyzylshamen syrqattaný 2,8 ese, salmonellezben aýyrý 2,1 ese azaiǵan. Bes aidyń ishinde 1,4 mln adamǵa juqpaly aýrýlarǵa qarsy profilaktikalyq ekpe jasaldy, bul egilýge tiis adamdardyń 92%-yn quraidy.
Al koronavirýs infektsiiasyna qatysty jaǵdai kúrdeli deńgeide qalyp otyr. Sońǵy eki aptada barlyq derlik óńirde naýqastar sany kóbeidi. Munyń negizgi sebebi — adamdardyń sanitarlyq talaptardy oryndamaýy men baqylaýdyń nasharlyǵy.
Úkimet basshysy Memleket basshysynyń tapsyrmasy boiynsha Vedomstvoaralyq komissiianyń sheshimimen aldaǵy demalys kúnderi birqatar iri qalalar men turǵyndarynyń sany 50 myńnan asatyn barlyq óńirlerdiń eldi mekenderde qosymsha shekteý sharalary engizildi.
«Bul sheshim jergilikti jerlerde naqty oryndalýy tiis. Ákimdikter sanitarlyq normalar men qoǵamdyq oryndarda áleýmettik araqashyqtyqtyń qatań saqtalýyna erekshe nazar aýdarýy tiis. Densaýlyq saqtaý ministrligine óńirlerdiń ákimdikterimen birlesip, koronavirýs infektsiiasynyń taralýyna qarsy kúres boiynsha jańa sharalar keshenin daiyndaýdy tapsyramyn. Árbir óńirdegi jaǵdaidy eskere otyryp, iske asyrylyp jatqan sharalardy túzetý boiynsha jedel sharalar qabyldansyn», — dedi A. Mamin.
Premer-Ministr jeke qorǵaný quraldarynyń otandyq óndirisin ulǵaitý jáne olardyń halyq úshin qoljetimdi bolýyn qamtamasyz etý sharalaryn qabyldaýdy, jasandy tynys alý apparattary men jeke qorǵanysh quraldarynyń jetkilikti qoryn qalyptastyrýdy, olardyń memlekettik materialdyq rezervte bolýyn qamtamasyz etýdi tapsyrdy.
Ákimdikterge iri kásiporyndardyń óz jumyskerlerin jeke qorǵanysh quraldarymen qamtamasyz etý máselesin pysyqtaý, Aýyl sharýashylyǵy ministrligine ártúrli infektsiialardyń taralýyna jol bermeý úshin profilaktikalyq sanitarlyq-veterinarlyq is-sharalardyń oryndalýyn qatań baqylaý tapsyryldy.
Úkimet basshysy halyqty jyl saiynǵy immýnizatsiialaý josparyn oryndaýdy jáne koronavirýs infektsiiasyna qatysty qazirgi jaǵdaidy eskere otyryp, is-qimyl algoritmin jandandyrýdy tapsyrdy.
