QR Úkimetiniń qaýlysymen Batys Qazaqstan oblysyndaǵy alapat sý tasqynynan keiin áýedegi elektr jelilerin qalpyna keltirý úshin tótenshe rezervinen 1,1 mlrd teńgeden astam qarajat bólindi. Bul týraly Úkimettiń baspasóz qyzmeti málimdedi.
Qarajat tabiǵi sipattaǵy TJ saldaryn joiý sheńberinde óńirlik biýdjetke aýdarylady. BQO ákimdigi QR Energetika ministrligine 1 jeltoqsanǵa deiin qarajattyń maqsatty paidalanylǵany jóninde esep berýge tiis.
Qalpyna keltirý jumystary kelesi ýchaskelerde júrgiziledi: 1. Báiterek aýdanyndaǵy Shalǵai – Talovaia; 2. Keńtúbek (Grigorevka) – Bórli aýdanyndaǵy Aleksandrovka; 3. Shyńǵyrlaý – Shyńǵyrlaý aýdanyndaǵy Ashysai (Myrzagora).
Eske sala keteiik, elimizde bolǵan alapat sý tasqyny saldarynan injenerlik, áleýmettik infraqurylym jáne joldar búlingen bolatyn. Atap aitqanda, 2,3 myńnan astam elektrmen jabdyqtaý tiregi qirap, 54 shaqyrym jeli úzilgen. Qazirgi tańda onyń 40%-dan astamy qalpyna keltirildi, jumys jaz ailarynda qarqyndy jalǵasyp jatyr.
Sondai-aq buǵan deiin Qostanai oblysynda elektr jelilerin qalpyna keltirýge tótenshe rezervinen 1,3 mlrd teńgeden astam qarajat bólý týraly Úkimet qaýlysy qabyldanǵan bolatyn. Qalpyna keltirý jumystary Arqalyq qalasy, Amangeldi jáne Jangeldi aýdandaryn qamtidy.
Zardap shekken azamattarǵa keltirilgen zalaldy óteý jáne infraqurylymnyń barlyq túrin qalpyna keltirý máseleleri Úkimettiń qatań baqylaýynda.
