Búgin Astanada Premer-Ministr Baqytjan Saǵyntaev Qazaqstannyń «Atameken» ulttyq kásipkerler palatasy tóralqasynyń keńeitilgen otyrysynda sóz sóiledi. Sondai-aq, otyrysta «Atameken» UKP tóralqasynyń tóraǵasy Timýr Qulybaev sóiledi, dep habarlaidy "Ult aqparat" primeminister.kz saityna silteme jasap.
Palatanyń 2017 jyldaǵy jumysy, 2018 jylǵa arnalǵan basymdyqty baǵyttar jáne biznestiń básekege qabilettigin arttyrý baǵdarlamasy týraly UKP basqarma tóraǵasy Abylai Myrzahmetov, UKP basqarma músheleri, basqarma tóraǵasynyń orynbasarlary Rýstam Júrsinov pen Tólemis Shotanov, kásipkerlerdiń quqyǵyn qorǵaý boiynsha qabyldanǵan sharalar týraly Qazaqstan kásipkerleriniń quqyqtaryn qorǵaý jónindegi ýákil Bolat Palymbetov baiandady.
Talqylaý barysynda memlekettik-jekeshelik seriktestik salasyndaǵy zańnamany jetildirý, biznesti memlekettik qarjylyq qoldaý sharalary, memlekettik jáne kvazimemlekettik satyp alýlarǵa qatysý, importty almastyrýdy damytý, memlekettik qyzmetterdi avtomattandyrý jáne tsifrlandyrý, sondai-aq Úshinshi jańǵyrtýǵa mamandardy daiarlaý máseleleri qaraldy.
Óz sózinde Baqytjan Saǵyntaev birlesken qyzmettiń negizgi baǵyttaryn belgiledi, sondai-aq, dialog barysynda týyndaǵan suraqtarǵa jaýap berdi. Kásipkerlikti damytý — Úkimettiń negizgi basymdyǵy. Bul eldiń ekonomikalyq ósýiniń jańa modelin qurýdyń basty baǵyty. 2050 jylǵa qarai shaǵyn jáne orta biznestiń eldiń JIÓ-degi úlesi 50%-dan kem bolmaýyn qamtamasyz etý týraly Memleket basshysynyń Úkimet pen biznes qaýymdastyǵy aldyna qoiǵan mindetterin oryndaý boiynsha aýqymdy jumystar júrgizilip jatyr.
Úkimet biznesti qaita retteý, ShOB iskerlik belsendiligin yntalandyrý jáne otandyq biznesti qoldaýǵa baǵyttalǵan is-sharalardy jetildirý úshin júieli jumystar júrgizip jatyr. Premer-Ministr elimizdiń aimaqtaryna jumys saparlary aiasynda óńirlik kásipkerler palatasynyń múshelerimen kezdesýler ótkizilgenin aityp ótti. Júielik suraqtardyń tizimi jasaldy, ol shamamen 500 suraqtan turady. Búginde olardyń shamamen 400-i sheshildi, qalǵandary boiynsha tiisti jumystar júrgizilýde.
Baqytjan Saǵyntaev mamandardy daiarlaý máselesine qatysty elimizde tehnologiialyq jańarý protsesi bastaý alǵanyn sóz etti. Iri kásiporyndar jańǵyrtý jumystaryn qolǵa aldy. Mamandardy osy syn-tegeýrinderdiń negizinde oqytý qajet. Búginde Atyraýda shet tilderin meńgergen mamandar daiarlaityn kolledj bar. Úkimet keler jyly ár oblys ortalyǵynda osyndai mamandandyrylǵan kolledjder ashýdy josparlap otyr. Kelesi jyldan bastap osyndai 20 kolledj jumys istei bastaidy.
Baqytjan Saǵyntaev aldaǵy ýaqytta da Úkimettiń kásipkerler qaýymdastyǵymen barlyq salada syndarly jumys isteýge daiyn ekenin jetkizdi.
«Úkimet biznes qaýymdastyǵymen ashyq dialogqa jáne birlesip jumys jasaýǵa daiyn. Bizde tek bir ǵana jol bar — 2050 jylǵa qarai álemniń eń ozyq damyǵan otyz eliniń qataryna qosylý», — dep sózin túiindedi Premer-Ministr.
Talqylaý qorytyndysy boiynsha Premer-Ministr Baqytjan Saǵyntaev otyrysta kóterilgen máselelerdi zerdeleý boiynsha jumys tobyn qurýdy tapsyrdy. Biyl jeltoqsan aiynda otyrys qorytyndysy boiynsha atqarylǵan jumystar týraly birinshi esepti tyńdaý josparda bar.
Aita keteiik, búgingi tańda litsenziialar men ruqsattar sany shamamen úsh esege qysqardy (1200-den 316-ǵa deiin). Baqylaý jáne qadaǵalaý fýnktsiialaryna tekseris júrgizildi. 114 baqylaý salasynyń 25-i jáne qadaǵalaýdyń 18 salasynyń 3-i alynyp tastalady. ShOB sýbektilerin tekserý boiynsha 17,6 myńnan astam talap qysqartyldy.
Qarjylyq qoldaý kórsetý aiasynda jalpy 800 mlrd teńgeden astam somaǵa 13 myńǵa jýyq ShOB jobalary qarjylandyryldy.
Densaýlyq saqtaý men bilim berý salalaryn yryqtandyrý maqsatynda 29 eskirgen jáne qaitalanatyn sanitarlyq erejeler joiyldy, kelesi kezeńde josparǵa sáikes 30-dan astam eskirgen erejelerdi joiý kózdelgen. Ótkizilgen jumys arnaiy tekserýlerden 34 500 nysandy bosatýǵa, al tekserýlerdiń sanyn 1,7 esege azaitýǵa múmkindik beredi.
Jekeshelendirý rásimi jeńildetildi. Memlekettiń nemese kvazimemlekettik sektordyń qatysýymen JShS úlesin satyp alýǵa basymdyqty quqyq joiyldy. Memlekettik satyp alýlar salasynda otandyq taýar óndirýshilerdi qoldaý tetigi ázirlendi — otandyq taýar óndirýshilerden Biryńǵai uiymdastyrýshy arqyly satyp alynatyn taýarlardyń, jumystardyń jáne qyzmetterdiń tizimi keńeitildi.
Memleket basshysynyń tapsyrmasy boiynsha «Tsifrlyq Qazaqstan» baǵdarlamasy aiasynda bizneske arnalǵan Ashyq tsifrlyq platforma qurylady. Memlekettik qoldaýdyń barlyq sharalary platformaǵa biriktiriledi.
