Premer-ministr Asqar Mamin ulttyq ekonomika, sondai-aq eńbek jáne halyqty áleýmettik qorǵaý ministrlerin tanystyrdy.
Úkimet basshysy ulttyq ekonomika, sondai-aq eńbek jáne halyqty áleýmettik qorǵaý ministrlikteriniń ujymdaryna jańa taǵaiyndalǵan ministrler – Áset Erǵaliev pen Serik Shápkenovti tanystyrdy.
Mamin burynǵy ulttyq ekonomika ministri Rýslan Dálenovke, sondai-aq burynǵy eńbek jáne halyqty áleýmettik qorǵaý ministri Birjan Nurymbetovke atqarǵan jumysy úshin alǵys aitty.
Jańa ulttyq ekonomika ministrin tanystyra otyryp, Asqar Mamin Áset Erǵalievtiń joǵary kásibiligi men quzyrettiligin atap ótti. Túrli jyldary ol Eýropa qaita qurý jáne damý bankinde aimaqtyq bas sarapshy, premer-ministrdiń keńesshisi, ulttyq ekonomika vitse-ministri, premer-ministr keńsesi basshysynyń orynbasary bolyp jumys istedi. Osy ýaqytqa deiin ulttyq ekonomika birinshi vitse-ministri qyzmetin atqardy.
Jańa eńbek jáne halyqty áleýmettik qorǵaý ministrin tanystyra otyryp, Asqar Mamin Serik Shápkenovtiń Batys Qazaqstan jáne Atyraý oblystary ákimderiniń birinshi orynbasary retindegi úlken tájiribesin atap ótti. Osy ýaqytqa deiin Shápkenov eńbek jáne halyqty áleýmettik qorǵaý vitse-ministri qyzmetin atqardy.
"Memleket basshysy Qasym-Jomart Kemeluly Toqaev elimizdiń áleýmettik-ekonomikalyq damýynyń jańa saiasatyn iske asyrý boiynsha aldymyzǵa mańyzdy mindetter qoidy. Olar ekonomikalyq damý sapasyn arttyrýǵa, ekonomikanyń ózindik jetkiliktiligine, salyq saiasatyn jetildirýge, investitsiialar tartýǵa jáne eksportty damytýǵa baǵyttalǵan qurylymdyq reformalardy júrgizýdi qamtidy", — dedi Mamin.
Sondai-aq premer-ministr áleýmettik salany jańǵyrtý boiynsha mańyzdy mindetter iske asyrylatynyn atap ótti.
