Búgin Úkimet otyrysynda Qazaqstan Respýblikasynyń Premer-Ministri Baqytjan Saǵyntaev órtke qarsy jumysty jáne tasqynǵa qarsy qorǵanysty qamtamasyz etý jóninde birqatar naqty tapsyrmalar berdi, dep habarlaidy "Ult aqparat".
Premer-Ministr turǵyn úi sektoryndaǵy órtterdiń aldyn alý jáne 2019 jylǵy sý tasqyny kezeńine daiarlyq týraly baiandamalardy tyńdaǵannan keiin, óńirlerde órt qaýipsizdigi men sý tasqynynan qorǵaý jumysynda erekshe kóńil bólýdi talap etetin problemalar bar ekenin atap ótti. Óńirlerdiń ákimderi qarjylandyrýdy qamtamasyz etý, oryn alǵan órtterdiń sebepteri, sondai-aq turǵyn úi sektoryn tekserý boiynsha júrgizilip jatqan sharalar sapasy máselelerine basa kóńil bólýi qajet.
QR Ishki ister ministrligi men barlyq ákimderge turǵyn úilerdegi órt qaýipsizdigi máselesin jylytý maýsymynyń sońyna deiin baqylaýda ustaý tapsyryldy. Turǵyn úi alabyndaǵy órttiń aldyn alý jumystaryn jalǵastyrý qajet, ásirese, kóp balaly jáne az qamtamasyz etilgen otbasylar, múmkindikteri shekteýli jandar men qarttar turatyn úiler jiti nazarda bolýy tiis.
Ishki ister ministrine uiymdastyrý jáne tártiptik sharalar keshenin ázirlep, iske asyrý tapsyryldy. Órt qaýipsizdigi jáne onyń aldyn alý jumysyn tiisinshe atqarmaǵany, baqylaý júrgizbegeni úshin:
- Ishki ister ministriniń orynbasary Iýrii Viktorovich Ilinge sógis jariialaý boiynsha QR Prezidentiniń Ákimshiligine usynys bildirý. Sebebi ishki ister ministriniń orynbasary Qazaqstan Prezidentiniń ókimimen taǵaiyndalǵan.
- Tótenshe jaǵdailar komitetiniń tóraǵasy Vladimir Robertovich Bekkerge qatań sógis jariialaý;
- Tótenshe jaǵdailar komiteti tóraǵasynyń orynbasary Barat Ospanuly Duzaqbaevty qyzmetinen bosatý;
- Astana Tótenshe jaǵdailar departamenti bastyǵynyń mindetin atqarýshy Marǵulan Topashuly Amanbaevqa qatań sógis jariialaý tapsyryldy.
Sý tasqyny jaǵdaiyna qatysty ózgeristerge daiyn bolý tapsyryldy. Qazgidromettiń boljamy boiynsha keibir ózenderde ylǵal qory normadan asyp tur. Qardyń túsýi áli jalǵasýda. Onyń ústine aqpannyń úshinshi onkúndiginde aýa temperatýrasy kóteriledi dep kútilýde.
Qazgidromettiń boljaýy boiynsha 1.02.19j. jaǵdai boiynsha Aqmola, BQO, Qaraǵandy jáne Qostanai oblystary ózenderiniń basseinderinde ylǵaldyq zapasynyń kólemi normadan artyq:
- Qostanai oblysynda Tobyl jáne Toǵyzaq ózenderiniń basseinderinde (10-30 %-ǵa), Aqmola oblysy Esil ózeninde (15 %-ǵa), Qaraǵandy oblysy Nura ózeninde (55 %-ǵa), Batys Qazaqstan oblysynyń barlyq ózenderinde (40-110 %-ǵa);
- taýly ózenderde: Túrkistan oblysynda Arys (15 %-ǵa), Shyǵys Qazaqstan oblysynda Ertis ózeniniń oń jaǵalaýynda (40 %-ǵa), sondai-aq Talas-Alataý, Qarataý (soltústik-batys bóliginde 15 %-ǵa) jáne Tarbaǵatai bókterinde (ońtústik-batys bóliginde 30 %-ǵa) artyq.
Qar áli jinalyp jatyr. Kóp jylǵy derekter boiynsha aqpanda, naýryz, sáýirde táýligine ailyq norma túsýi múmkin.
Ailyq sinoptikalyq boljam boiynsha (20-80%-ǵa aqtalady) aqpannyń úshinshi onkúndiginde kúndizgi jáne túngi aýa temperatýrasynyń kóterilýi yqtimal, bul qardyń erip, erigen sýdyń jinaqtalýyna, sý deńgeiiniń kóterilýine alyp kelýi múmkin.
Qar zapasynan basqa, jazyq ózenderdiń sý deńgeiin aiqyndaityn mańyzdy faktorlardyń biri topyraqtyń kúzde ylǵaldanýy. Bul Qaraǵandy oblysyndaǵy Nura jáne Sherýbainura ózenderi basseinderinde normadan 100%-ǵa joǵary, Aqmola oblysyndaǵy Esil, Sileti, Shaǵalaly, Jabai jáne Kolýton ózenderiniń basseinderinde 68%-ǵa normadan tys, Qostanai, Aqtóbe, Atyraý jáne Batys Qazaqstan oblystary ózenderiniń basseinderinde normadan 40-50%-ǵa az.
Soǵan bailanysty Premer-Ministr óńirlerdiń ákimderine birqatar naqty tapsyrmalar berdi.
Birinshi. Tasqyn qaýpiniń aldyn alý jáne joiý boiynsha jol kartasyn sapaly iske asyrýdy qamtamasyz etý qajet. Jumysty úilestirý Ishki ister ministrligine júkteledi. Ekinshi. Iesiz gidroqurylystardy kommýnaldyq menshikke berý jumystaryn aiaqtaý qajet. Úshinshi. Sý saqtaý aimaqtary men beldeýlerinde turatyn adamdar men obektilerdi qaýipsiz jerlerge kóshirýdi qamtamasyz etý kerek. Tórtinshi. Ishki ister ministrligi ákimdermen birlesip, sý tasqyny maýsymyna kúshter men quraldardyń tolyq daiyndyǵyn, qaýip tóngen jaǵdaida halyqty ýaqytynda habardar etýdi qamtamasyz etýi tiis. Tótenshe jaǵdaida jedel shara qoldaný qajet. Besinshi. Aqmola, Almaty, Qaraǵandy, Qostanai jáne Túrkistan oblystary men Aýyl sharýashylyǵy ministrligi Jospardaǵy is-sharalardy oryndaý úshin barlyq jumysty oryndaýy qajet. Jospardy oryndaý kezinde onyń Agroónerkásiptik keshendi damytý baǵdarlamasymen biriktirilgenin eskerý qajet.
Ulttyq ekonomika, Qarjy ministrlikterine Aýyl sharýashylyǵy ministrligimen jáne oblystardyń ákimderimen birlesip, jańa sý qoimalaryn salý jáne shaǵyn sý qoimalaryn rekonstrýktsiialaýǵa tehnikalyq-ekonomikalyq negizdemeler ázirleýdi qarjylandyrý máselesin qaraý tapsyryldy.
