Túrkistan oblysyna jumys sapary barysynda QR Premer-Ministri Álihan Smaiylov «Kerýen-sarai» keshenine baryp, investorlarmen jáne óńirde jumys istep jatqan týristik sala ókilderimen kezdesti. Bul týraly Qazaqstan Respýblikasy Premer-Ministriniń baspasóz qyzmeti habarlady.
Premer-Ministrge gaz jáne kún elektr stantsiialarynyń qurylysy, kómir-himiia, munai-himiia jáne kúkirt qyshqyly zaýyttaryn, kaýstikalyq soda, PVH, kaltsii karbidi men tsement óndiretin himiia keshenin, Ógem ózenindegi GES kaskady bar sý qubyryn, jylyjai keshenin, bordaqylaý alańyn salý boiynsha jáne t. b. jańa investitsiialyq jobalar tanystyryldy.
«Bulardyń barlyǵy da oblys úshin áleýmettik jáne ekonomikalyq mańyzy joǵary jobalar. Olar turaqty jumys oryndaryn qurýǵa múmkindik beredi jáne ónerkásip ónimderiniń kólemin edáýir arttyrady. Oblys ákimdigi jobalardyń ýaqytyly iske asyrylýyn erekshe baqylaýǵa alyp, qajetti infraqurylymmen qamtamasyz etýi tiis», — dedi Álihan Smaiylov.
Onyń aitýynsha, jańa elektr stantsiialaryn iske qosý ońtústik óńirdegi energiia tapshylyǵyn azaitýǵa múmkindik beredi, al jańa agrarlyq nysandar eldiń azyq-túlik qaýipsizdigin qamtamasyz etý týraly Prezident tapsyrmalaryn júzege asyrýǵa yqpal etetin bolady.
Óz kezeginde investorlar jobalarmen jumys isteý kezinde týyndaǵan birqatar problemalyq máselelerdi kóterdi. Álihan Smaiylov memlekettik organdarǵa olardy muqiiat qarap, zańnama sheńberinde járdem kórsetýdi tapsyrdy.
Sonymen qatar Premer-Ministrge óńirdiń negizgi baǵyttary tarihi-tanymdyq, qajylyq, emdik-saýyqtyrý, eko jáne etnotýrizm bolyp tabylatyn týristik salasynyń damý qarqyny týraly baiandaldy. Atap aitqanda, Álihan Smaiylovqa «Qasqasý» týristik-rekreatsiialyq kesheniniń jobasy tanystyryldy, onda kúnine 4 myńǵa jýyq adam demalatyn bolady.
«Jyl boiyna sapaly qyzmet kórsetetin týrizm nysandarynyń ekonomikalyq tiimdiligi qashanda joǵary bolmaq. Menińshe, Túrkistan oblysynyń osy baǵytta áleýeti zor», — dedi Álihan Smaiylov.
Sondai-aq ol týristermen jumys isteý úshin bilikti kadrlardy daiarlaý sapasyna da nazar aýdarý kerektigin atap kórsetti.
Premer-Ministr jumys sapary aiasynda Qoja Ahmet Iasaýi kesenesine baryp, «Áziret Sultan» memlekettik tarihi-mádeni mýzei-qoryǵyn abattandyrý jumystarynyń barysymen tanysty.
