QR Premer-Ministri Asqar Maminniń tóraǵalyǵymen ótken Úkimet otyrysynda Elbasynyń Bes áleýmettik bastamasyn iske asyrý aiasynda stýdent jastardy jataqhanalarmen qamtamasyz etý máselesi qaraldy, dep habarlaidy "Ult aqparat".
Atqarylyp jatqan jumystar týraly QR bilim jáne ǵylym ministri K. Shámshidinova baiandady, sondai-aq jataqhanalar salý boiynsha belsendi jumystar júrgizilip jatqan, tájiribelerin basqa óńirler úlgi ete alatyn Jambyl oblysynyń, Nur-Sultan, Shymkent qalalarynyń ákimderiniń baiandamalary tyńdaldy.
"QR Úkimetiniń aldynda 2022 jylǵa deiin 75 myń oryndyq jańa stýdenttik jataqhanalardy paidalanýǵa berý mindeti tur. Osy qajettilikti sheshýge tiis qarjy modeli ázirlengen, ol oqý oryndarynyń óz qarajaty nemese investor qarajaty esebinen jataqhanalardy engizýdi jáne paidalanýǵa bergennen keiin memlekettik tapsyrysty ornalastyrýdy qarastyrady. Kásipkerler úshin barlyq múmkindikter jasalǵan. Bankterdiń paiyzdyq mólsherlemesi 7%-ǵa deiin tómendetilip, qurylys erejeleri jeńildetildi, memlekettik tapsyrys qarjy jaǵynan qamtamasyz etildi", - dedi Úkimet basshysy.
A. Mamin aralyq oń qorytyndylardy da atap ótti.
«Osy jyldyń sońyna deiin 9 myńnan astam oryn paidalanýǵa beriledi dep kútilýde, jospardaǵysy — 5 myń oryn.
Joǵary deńgeidegi bilim berý júiesin qurý úshin stýdentterdiń turmys jaǵdaiyn jasaý kerek», — dedi Asqar Mamin.
Osylaisha, QR Premer-ministri jataqhanalardy paidalanýǵa berýdiń naqty josparlaryn ázirlep, oryndaýdy qamtamasyz etýdi tapsyrdy. Bul baǵytta investorlarmen birikken jumys uiymdastyrylyp, jataqhanalar salýdy birlesken kúsh-jigermen, memlekettik-jekemenshik áriptestik aiasynda jalǵastyrý qajet ekeni aityldy. Bul rette qolda bar tetikti negizge alyp jumys isteý kerek, sebebi jataqhanalar qurylysyna biýdjetten qosymsha qarajat bólinbeidi.
«Ákimder rektorlarmen jáne oqý oryndarynyń basshylarymen birlesip, stýdentter jataqhanalaryn salý jumysyn jandandyryp, josparlanǵan nysandardy ýaqytynda tapsyrýdy qamtamasyz etsin, qymbat jobalyq-smetalyq qujattama ázirleýdi toqtatsyn», — dep tapsyrdy A. Mamin.
