XII Astana ekonomikalyq forýmy alańynda QR Premer-Ministri Asqar Mamin Nokia korporatsiiasynyń Direktorlar keńesiniń tóraǵasy Risto Siilasmaamen kezdesti, dep habarlaidy primeminister.kz.
Kezdesý barysynda tsifrlandyrýdy damytýdyń qazirgi betalystary talqylanyp, «Tsifrlyq Qazaqstan» memlekettik baǵdarlamasy aiasynda birlesken jobalardy iske asyrý prespektivalary qaraldy. Taraptar telekommýnikatsiialyq naryqty damytý salasyndaǵy ózara tiimdi yntymaqtastyqty arttyrýǵa erekshe kóńil bóldi. Talqylaý taqyryby infraqurylymdyq servister men biznestiń jańa múmkindikterin qurý úshin úlken derekterdi taldaýmen jáne zattar internetimen «besinshi býyn» bailanys jelisin damytý boldy.
QR Úkimetiniń basshysy A. Mamin telekommýnikatsiialar naryǵyn keńeitip, 5G tehnologiialaryn engizý kózdelip otyrǵanyn jetkizdi, osy maqsatta Qazaqstannyń birqatar qalalarynda pilottyq joba iske qosyla bastady. Búginde «besinshi býyn» bailanys jelisi Nur-Sultan, Almaty, Shymkent qalalarynda jáne Aqmola, Almaty oblystarynda testileýiden ótkizilýde.
Kezdesý qorytyndysy boiynsha «Qazaqtelekom» AQ Nokia-men birlesip ázirlegen 5G tehnologiialarynyń múmkindikteriniń tanystyrylymy ótti. QR Premer-Ministri Asqar Mamin jabdyq pen jeli jumysynyń sapaly kórsetkishterin tekserdi. Jańa jelini engizý derekterdi taratý jyldamdyǵyn aitarlyqtai arttyrady, bul ziiatkerlik kólik júielerin damytýǵa, iri óndiristik kompaniialarda, logistikada jáne t.b. salalarda ónerkásiptik robottardy paidalaný múmkindigin keńeitýge jol ashady.
Stend — Qazaqstandaǵy 5G tehnologiiasynyń alǵashqy implementatsiiasy. Jalpy, Forým qatysýshylaryna jańa býyn tehnologiialaryn synap kórip, mobildi bailanystyń besinshi býynyn qoldanýdyń praktikalyq múmkindikterin, sonyń ishinde bailanystyń joǵary jyldamdyǵyn, asa tómen jelilik irkilisterdi, jaýap qatýdyń joǵarǵy dáldigimen nysandy qashyqtan basqarýdy jáne t.b. baǵalaý múmkindigi berildi.
