Úkimet basshysy Baqytjan Saǵyntaev Naýryz meiramy qarsańynda azyq-túlik baǵasynyń negizsiz ósýine jol bermeýdi tapsyrdy, dep habarlaidy Sputnik Qazaqstan.
"Baǵa máselesin qatań baqylaýǵa alyńyzdar. Alda taǵy da Naýryz merekesi kele jatyr. Osyǵan bailanysty baǵa kúrt ósip ketip júrmesin!", — dep tapsyrdy premer-ministr úkimet otyrysynda.
Ulttyq ekonomika ministri Timýr Súleimenovtiń aqparatynsha, jyl basynan beri áleýmettik mańyzy bar azyq-túlik baǵasy 0,7%-ǵa ósken.
"Eń joǵary baǵa: qyryqqabat – 12,7%; piiaz – 7,4%; kartop – 5,5%; sábiz – 4,5%. Baǵanyń ósýine maýsymdylyq, saqtaý kezindegi taýarlardyń buzylýy jáne shyǵyndary, qysqy kezeńde qolaisyz aýa raiynda tasymaldaý sebep bolyp otyr", — dedi ol.
Onyń aitýynsha, qaraqumyq, kúrish, 1 sanattaǵy jumyrtqa, 1 surypty bidai uny, taýyq eti, kúnbaǵys maiy men tuz ónimderi kerisinshe arzandaǵan. 8 taýar boiynsha baǵa bekitilgen aralyq sheginde qalyp otyr.
"Áleýmettik mańyzy bar azyq-túlik taýarlary baǵasyn turaqtandyrý jáne ustap turý maqsatynda ulttyq ekonomika ministrligi 2018 jylǵa shekti mánderdi bekitti", — dedi Súleimenov.
Ministr áleýmettik mańyzy bar azyq-túlik taýarlary qymbattaǵan óńirlerdi atady.
"Eń joǵary ósim – Astanada (102,2%), Almaty qalasynda (101,6%) jáne Aqtóbe oblysynda (101,3%) baiqalady. Azyq-túlik túrleri boiynsha Almaty qalasynda qyryqqabat baǵasy (28,9%), Astanada kartop (12,7%), Qaraǵandyda sábiz (12%) baǵasy aitarlyqtai ósti", — dedi vedomstvo basshysy.
