Memleket basshysy Qasym-Jomart Kemeluly Toqaevtyń biylǵy 11 qańtarda QR Parlamenti Májilisiniń otyrysynda bergen tapsyrmasyn oryndaý aiasynda Qazaqstannyń birneshe qoǵamdyq uiymy «Qazaqstan halqyna» qoǵamdyq áleýmettik qoryn (QÁQ) qurdy.
Qordyń quryltaishylary «Qazaqstan halqyna» QÁQ tóraǵasy qyzmetine memleket qairatkeri, belgili qarjyger Bolat Jámishevti sailady. Baqylaýshylar keńesine densaýlyq saqtaý men bilim berý salalarynyń belgili qairatkerleri, sondai-aq QR qoǵamdyq birlestikteriniń ókilderi kirdi.
«Qazaqstan halqyna» QÁQ densaýlyq saqtaý, bilim berý, halyqtyń áleýmettik jaǵynan az qamtylǵan toptaryn áleýmettik qoldaý salasyndaǵy naqty problemalardy sheshýmen ainalysatyn bolady. Qordyń qyzmeti qoǵamdy biriktirýge jáne áleýmettik ádilettilikti nyǵaitýǵa yqpal etedi.
Qor jeke jáne memlekettik kózderden qarjylandyrylady, sonymen qatar halyqaralyq qaiyrymdylyq uiymdarynyń kómegin tartý josparda bar.
QR Úkimetiniń basshysy Á. Smaiylov pen QR Premer-Ministri Keńsesiniń qyzmetkerleri bir kúndik eńbekaqylaryn «Qazaqstan halqyna» qoryna aýdardy.
Úkimet biznes ókilderin, eń aldymen, iri biznesti áleýmettik jaýapkershilik tanytyp, Qordy qarjylandyrýǵa kómek kórsetýge shaqyrady.
