QR Premer-Ministri Asqar Mamin otandyq taýar óndirýshilerdi qoldaý taqyrybyna arnalǵan «Samruk Business Forum» plenarlyq sessiiasyna qatysty, dep habarlaidy "Ult aqparat" primeminister.kz saityna silteme jasap.
«Qazaqstannyń Tuńǵysh Prezidenti – Elbasy Nursultan Ábishuly Nazarbaev ishki naryqty otandyq taýar óndirýshilerdiń ónimderimen qamtamasyz etýge jáne “qarapaiym zattar ekonomikasyn” damytýǵa erekshe kóńil bóledi. Memleket basshysy Qasym-Jomart Kemeluly Toqaev Úkimet aldyna otandyq taýar óndirýshilerdi qoldaý men damytý jóninde birqatar naqty mindet qoidy», — dedi A. Mamin.
Úkimet basshysy jyl saiyn satyp alý kólemi 4 trln teńgeden asatynyn jáne bul kólemdi ishki óndiristi damytý múddesinde tiimdi paidalaný óte mańyzdy ekenin atap ótti.
«Samuryq-Qazyna» qory shaǵyn jáne orta biznesti damytý úshin joǵary áleýetke ie. Qordyń árbir derlik enshiles kompaniiasy “zákirli”, al keide óz óńiri úshin qala quraýshy kásiporyn bolyp tabylady», — dedi A. Mamin.
Otandyq óndiris pen importty almastyrýdy damytýdyń tiimdi draiveri retinde offteik-kelisimsharttar men uzaqmerzimdi sharttar tetigi qurylyp, sátti jumys istep tur. Qazirgi ýaqytta investitsiialar kólemi 215 mlrd teńgeden asatyn, jańa óndiristerdi qurý boiynsha 27 offteik-kelisimshart maquldandy, shamamen 2 myń jumys orny qurylatyn bolady. Úkimet Ulttyq bankpen birlesip, ekinshi deńgeili bankterdiń osyndai sharttardy turaqty kepil retinde tanýy boiynsha jumys júrgizýde, bul atalǵan jobalardy qarjylandyrýǵa qoljetimdilikti jeńildetedi.
«Samuryq-Qazyna» qory 1350-den astam taýarlyq pozitsiia boiynsha pýldy anyqtady, ol importty almastyrýǵa qatysty biznestiń bastamalarynyń “jańa tolqynyna” ainalýy tiis. Búgingi kúnniń ózinde jumys istep turǵan 180 kásiporyn investitsiialyq jobalardy ázirlep, iske asyrýǵa zor qyzyǵýshylyq tanytty», — dedi A. Mamin.
Premer-Ministr jobalardy, sondai-aq biznestiń jańa jumys oryndaryn ashý, jergiliktendirýdi arttyrý jáne sapaly ónim shyǵarý túrindegi qarsy mindettemelerdi qabyldaýǵa ázirligin jan-jaqty pysyqtaý qajettigin atap ótti.
A. Mamin Qordyń júie quraýshy kompaniialarynyń satyp alýlary aiasynda «Samuryq-Qazyna»-nyń monoqalalardy damytý boiynsha jumystardy bastaǵanyn atap ótti.
«Mysaly, tek Jańaózen qalasy boiynsha bul bastama aiasynda 230 mlrd teńge somasyna satyp alýlardy ótkizý josparlanǵan. Bul óńirdiń ekonomikalyq damýy úshin qosymsha serpin beredi», — dedi Úkimet basshysy.
A. Mamin «Samuryq-Qazyna» qorynyń «qarapaiym zattar ekonomikasyn» iske asyrýǵa belsene qatysatynyn atap ótti. Bul rette qurylys-montaj jumystaryn satyp alý kezinde otandyq qurylys materialdary men jabdyqtaryn paidalanýdyń mańyzdylyǵyn aitty.
«Samuryq-Qazyna»-nyń sátti tájiribesi retteletin barlyq satyp alýlarda, onyń ishinde memlekettik organdardyń, kvazimemlekettik kompaniialar men jer qoinaýyn paidalanýshylardyń satyp alýlarynda mysal retinde taralýy tiis. Olardyń jiyntyq kólemi asa aýqymdy jáne 15 trln teńge kóleminde baǵalanady», — dedi A. Mamin.
Premer-Ministr tsifrlyq tehnologiialar, mashina jasaý, himiia, jihaz, toqyma, aiaq kiim, ónerkásip, elektr energetikasy men munai-gaz jabdyqtary salalaryndaǵy otandyq taýar óndirýshilerdiń ónimderi kórmesimen, sondai-aq imoport almastyrýdy odan ári damytý áleýetimen tanysty.
Sharaǵa 900-ge jýyq adam — «Samuryq-Qazyna» basqarma tóraǵasy A. Esimov, «Atameken» UKP basqarma tóraǵasy A. Myrzahmetov, ulttyq kompaniialar basshylary men qazaqstandyq biznes ókilderi qatysty.
Forým aiasynda «Samuryq-Qazyna» qory, onyń enshiles kompaniialary men otandyq taýar óndirýshiler arasynda jalpy somasy 35 mlrd teńgege jýyq bolatyn offteik-kelisimsharttary jasaldy, sondai-aq «Úzdik servistik kompaniia», «Senimdi jetkizýshi» jáne t. b. atalymdar boiynsha jetekshi otandyq kompaniialardy marapattaý saltanaty ótti.
