Búgin Memleket basshysynyń tapsyrmasymen QR Premer-Ministri Baqytjan Saǵyntaev jumys saparymen Almaty oblysyna keldi. Munda bilim berý jáne densaýlyq saqtaý salalarynyń qyzmetkerlerimen, sondai-aq kásipkerler qaýymymen Prezidenttiń «Qazaqstandyqtardyń ál-aýqatynyń ósýi: tabys pen turmys sapasyn arttyrý» joldaýyn iske asyrý jóninde kezdesýler ótkiziledi, dep habarlaidy "Ult aqparat".
Jumys sapary barysynda Premer-Ministr birqatar iri infraqurylymdyq nysandardy aralaidy. Qytaimen shekaradaǵy «Nur joly» avtomobil ótkizý pýnktiniń, «Qorǵas» ShYHO baqylaý-ótkizý pýnktiniń jumystaryn jáne shekara mańy ǵimarattarynyń qurylysy barysyn tekseredi. Oǵan qosa, Baqytjan Saǵyntaev kelesi jyly paidalanýǵa beriletin shekara mańy yntymaqtastyǵy halyqaralyq ortalyǵynyń qyzmetimen jáne 100 myńǵa jýyq adamdy ornalastyrýǵa arnalǵan «Nurkent» jańa qalasyn damytýdyń bas josparymen tanysady.
Oblys ortalyǵynda áleýmettik-mádeni infraqurylymnyń jańa nysandaryn baryp kóredi. Máselen, tehnikalyq mektep-litseidi aralaý kezinde óńirde usynylatyn bilim berý qyzmetteriniń sapasymen jáne ony odan ári jetildirý jumystarymen tanysady. Kásipkerlerge qyzmet kórsetý ortalyǵynda oblystyń áleýmettik-ekonomikalyq damý barysy, «Prezidenttiń Bes áleýmettik bastamasyn» iske asyrý, sonyń ishinde gazdandyrý máseleleri, sondai-aq, TUK tarapynan investitsiialar tartýǵa qajetti jaǵdailar jasaý, MJÁ qaǵidasyn qoldanýdy keńeitý jáne ishki ári syrtqy týrizmdi damytý máseleleri qaralady.
Óńirge kelgen boida B. Saǵyntaev biyl kóktemde paidalanýǵa berilgen Taldyqorǵan áýejaiynyń jańa terminalyn kórdi. Bul nysan ishki jáne halyqaralyq áýe qatynastaryna ushatyn jolaýshylarǵa, sondai-aq, shyǵaryp salýshylar men kútip alýshylarǵa jyl boiy ushar aldyndaǵy jáne qonǵannan keiin keshendi qyzmetti kórsetýge arnalǵan.
Budan ózge, Almaty oblysynyń ákimi A. Batalov Úsharal qalasynyń áýejaiyn damytý jáne Alakól kóliniń jaǵalaýyn bekitý jobalarymen tanystyrdy.
Ótken jyly Almaty oblysynyń ákimdigi Úsharal qalasy áýejaiynyń aerovokzal ǵimaratyn salýdy aiaqtady. Osy jyldyń maýsym aiynan bastap Úsharal áýejaiynan aptasyna úsh ret «Astana — Úsharal» jáne «Taldyqorǵan — Úsharal», aptasyna bes ret «Almaty — Úsharal» baǵytynda áýe reisteri oryndalýda. Sonymen qatar, qazirgi tańda ushý-qoný jolaǵyn rekonstrýktsiialaý jumystary júrgizilip jatyr, bul áýejaidyń Boeing sanatynyń áýe kemelerine qyzmet kórsetýine jol ashady.
Biyl bir millionnan astam týrist kelgen Alakól kóliniń jaǵalaýyn damytý maqsatynda keshendi infraqurylymdy jańǵyrtý jumystary jalǵasyp jatyr. 2019 jyly Alakól kóliniń jaǵalaýynda sýmen jabdyqtaý jáne sý tartý júielerin – uzyndyǵy 72,9 shaqyrym bolatyn tazartý nysandary, sondai-aq, 50 shaqyrymǵa arnalǵan sýmen jabdyqtaý júiesin salý kózdelgen. Budan ózge, jaǵalaýdy bekitý men keme aialdaityn ailaqtardy salýdyń jańa tehnologiialaryn engizý josparda bar. Oblys ákiminiń aitýynsha, qorshalǵan bóget Kóktuma men Aqshi aýyldarynyń turǵyndaryn — 2,5 myńnan astam adamdy Alakól kóliniń qatty tolqyndarynyń zalal keltirýinen qorǵaýǵa múmkindik beredi.
Aita ketý kerek, oblys ákimdiginiń derekterine sáikes, týristik infraqurylymdy damytý boiynsha qabyldanyp jatqan sharalar 2016 jyldan bastap (452 myń adam) Alakól aýdanynda qyzmet kórsetilgen týrister sanyn eki eseden astam ulǵaitýǵa múmkindik berdi. Jalpy, oblys boiynsha bir jylda keletin týrister sany 1,96 mln quraidy.
.jpeg)