Qazaqstan Úkimeti áleýmettik jaǵdaiy tómen azamattardyń boryshyn tóleýge memleketten bólinetin qarajatty paidalaný tártibi týraly qujat jobasyn qoǵamdyq talqylaýǵa usyndy. 30 maýsymda elektrondyq úkimet portalynda jariialanǵan qujat 15 shildege deiin talqylanady.
Oǵan sáikes, Eńbek jáne halyqty áleýmettik qorǵaý ministrligi 2019 jylǵy 15 shildege deiin kómekke muqtaj adamdardyń tizimin jinap, ony "memlekettik kredittik biýroǵa" jiberedi. Kredittik biýro bul tizimdi 20 shildege deiin ekinshi deńgeidegi bankterge jáne mikroqarjy uiymdaryna joldaidy. Olar 25 shildege deiin negizgi borysh, syiaqy jáne jyldyq tiimdi syiaqy stavkasynyń mólsheri boiynsha bereshekti kórsete otyryp, árbir qaryz nemese mikrokredit boiynsha bóle otyryp kredittik biýroǵa joldaidy.
Kredittik biýro tólemge arnalǵan tizimdi ázirleidi.
«Problemalyq kreditter qory» aktsionerlik qoǵamy 9 tamyzǵa deiin ekinshi deńgeidegi bankterde jáne mikroqarjy uiymdarynda kepilsiz tutynýshylyq qaryzdar boiynsha bereshekti óteý úshin kelisim jasaidy.
Eńbek jáne áleýmettik kómek ministrligi 15 tamyzǵa deiin «Problemalyq kreditter qoryna» qarjy aýdaryp, sońǵysy ol qarjyny 1 qyrkúiekke deiin ekinshi deńgeidegi bankterde jáne mikroqarjy uiymdaryna jiberedi.
26 maýsymda Qazaqstan prezidenti Qasym-Jomart Toqaev turmysy tómen toptardyń kreditin óteý týraly jarlyqqa qol qoiǵan.
1 maýsymǵa deiingi jalpy qaryzy 3 million teńgeden aspaityn kóp balalylardyń, asyraýshysynan airylǵan otbasylar men múgedek bala baǵatyndardyń, ata-anasyz qalǵan 29 jasqa deiingi jastardyń 300 myń teńgege deiingi krediti keshiriledi. Jarlyqty iske asyrý úshin Toqaev Úkimet pen Ulttyq Bankke tapsyrma berdi.
Qarjy ministrligi Prezident Qaýlysyn júzege asyrý úshin 105 milliard teńge qajet ekeni habarlaǵan.
