Qarý-jaraq qoimasyndaǵy jarylystan zardap shekken Arys qalasyn qalpyna keltirý biýdjeti – 56,1 milliard teńge. Bul týraly Qazaqstan premer-ministriniń birinshi orynbasary – qarjy ministri Álihan Smailov Tengrinews.kz saityna aitty.
Smailovtyń sózinshe, Arysty jóndeýge úkimet qorynan – 27,5 mlrd teńge, jergilikti biýdjetten – 20 mlrd teńge, «Samuryq-Qazyna» qorynan – 6 mlrd teńge bólingen. Budan bólek, demeýshiler men qaiyrymdylyq kómekten 2,6 mlrd teńge jinalǵan.
Bul qarjy Arystyń ár turǵynyna 100 myń teńge ótemaqyny tóleýge, qaladaǵy úiler men áleýmettik nysandardy jóndeýge, jańa úiler salýǵa jumsalady.
2019 jyldyń 24 maýsymynda Arys mańyndaǵy qarý-jaraq qoimasynda jarylys boldy. Jarylystan qaladaǵy ǵimarattardyń biraz bóligi qiraǵan. Sol kúni Arys qalasynan 40 myńnan astam adam jaqyn mańdaǵy eldimekenderge qashty. Jarylystan úsh adam qaza tapqan. Onyń ekeýi - áskeri qyzmetker, bireýi - beibit turǵyn. Júzdegen adam aýrýhanaǵa túsken. Solardyń biri 8 jasar Aian Erboluly 2 tamyzda aýrýhanada kóz jumdy. Arystaǵy jarylystan qashyp bara jatqan ony kólik qaqqan.
Arystaǵy jarylystan qashyp Shymkentke barǵan turǵyndar qarý qoimasyna jaqyn ornalasqan qalaǵa barmaityndaryn aityp, bilikten basqa jaqqa kóshirýdi talap etken. Biraq bilik arystyqtardyń bul talabyna qulaq aspai, turǵyndardy qalaǵa qaitarǵan. Nur-Sultan Arys qalasynyń mańyndaǵy oq-dári qoimasyn basqa jaqqa kóshirýge ýáde etken.
Úkimet Arystaǵy jóndeý jumystary 1 tamyzǵa deiin aiaqtalady degenimen qalada jumys áli jalǵasyp jatyr. Turǵyndardyń keibiri jóndeý jumystaryna kóńili tolmaidy.
8 tamyzda Arysqa jóndeý jumystaryna barǵan Nur-Sultan turǵyny Ermek Tútebekov jol apatynan qaitys boldy.
