Otandyq azyq-túlikpen import almastyrý maqsatynda Qazaqstanda qus fabrikalaryn, et kombinattaryn, sút zaýyttaryn, qant jáne balyq zaýyttaryn qurý, sondai-aq qarqyndy alma baqtaryn damytý boiynsha 44 joba iske asyrylmaq. Bul týraly Ortalyq kommýnikatsiialar qyzmetinde Ulttyq ekonomika ministrliginiń basshysy Rýslan Dálenov málimdedi, dep habarlaidy ort.com.
Osy maqsatta 10 baǵyt boiynsha qarjylyq jáne qarjylyq emes sharalar qarastyrylǵan 2020 jyldyń sońyna deiin ekonomikalyq ósýdi qalpyna keltirý jónindegi keshendi jospar iske asyrylýda. Onda salyqtyq yntalandyrýlarmen qatar nesielendirýdi keńeitý, infraqurylymdy damytý, ishki óndiristi, kásipkerlikti qoldaý jáne jumyspen qamtýdy saqtaý boiynsha sharalar qarastyrylǵan. Ústimizdegi jyldyń qyrkúiek aiynda túzetýlerdiń ekinshi paketi bólek zań jobasy túrinde depýtattardyń qaraýyna engiziletin bolady.
Ministrdiń málimetinshe, Ónerkásipti damytý qoryn qurý, offteik-kelisimsharttar jasaý, joǵary bólinisti ónimderdi eksporttaý kezinde kólik shyǵyndarynyń 80-na deiin óteý josparlanýda. Bul rette óńdeýshi kásiporyndar Qor arqyly 3%-dan aspaityn mólsherlememen nesie ala alady. Lizingtik qarjylandyrý arqyly joǵary tehnologiialyq quiý zaýytyn, júk avtomobilderiniń jetekshi kópirleriniń basty berilisteriniń redýktorlaryn óndirý zaýytyn jáne avtomobil shinalaryn óndirý zaýytyn salý siiaqty jobalar iske asyrylady.
Aýyl sharýashylyǵy taýaryn óndirýshiler úshin forvardtyq kelisimsharttardy engizý jáne «egis dalasynan sórege deiin» qaǵidaty boiynsha qarjylandyrý tetigin engizý agrarlyq ónimdi turaqty satyp alýdy jáne ótkizýdi qamtamasyz etýge múmkindik beredi.
«Egis dalasynan sórege deiin» pilottyq jobasyn Jambyl, Túrkistan jáne Almaty oblystarynda iske asyrý josparlanǵan. Ol úshin barlyq qajetti daiyndyq jumystary júrgizilýde», - dedi R.Dálenov.
Sondai-aq ministr óz sózinde «5-10-20» jeńildetilgen nesieleý boiynsha pilottyq jobany iske qosý, «Jumyspen qamtý jol kartasy» nysandarynyń qurylysy barysynda otandyq qurylys materialdaryn satyp alýdy qamtamasyz etý, memlekettik qyzmetterdi tsifrlandyrý boiynsha Jol kartasyn jáne «Eńbek» memlekettik baǵdarlamasy sheńberinde jumyspen qamtýǵa járdemdesýdi memlekettik qoldaý sharalaryn iske qosý, «Elektrondyq úkimet» veb-portaly arqyly jumyssyzdardy tirkeý merzimin qysqartý, ShOB sýbektilerin nesieleý protsedýralaryn jeńildetýge toqtaldy.
