Búgin Premer-Ministr Baqytjan Saǵyntaevtyń tóraǵalyǵymen ótken QR Úkimetiniń otyrysy barysynda 2017–2021 jyldarǵa arnalǵan Qazaqstannyń áleýmettik-ekonomikalyq damý boljamy jáne 2017–2019 jyldarǵa arnalǵan respýblikalyq biýdjet parametrleri qaraldy, dep habarlaidy "Ult aqparat".
Ulttyq ekonomika ministri Timýr Súleimenov elimizdiń áleýmettik-ekonomikalyq damý boljamy 2016 jylǵy JIÓ boiynsha eseptik derekter men osy jyldyń kórsetkishteri negizinde anyqtalǵanyn málimdedi.
2017 jyldyń basynan beri QR-da ekonomikalyq belsendiliktiń jaqsarǵany baiqalady. Osy jyldyń toǵyz aiyndaǵy JIÓ ósimi 4,3%-dy quraǵan, al jalpy jyl qorytyndysy boiynsha ekonomika ósimi 3,4% deńgeiinde bolady dep kútilýde. 2017 jyly ataýly JIÓ 51 855,3 mlrd teńge kóleminde boljanǵan, bul aqpanda maquldanǵan kórsetkishten 2 114,7 mlrd teńgege joǵary. Halyqtyń jan basyna shaqqanda JIÓ $8,7 myńǵa deiin ulǵaiady.
Ónerkásip ósimi taý-ken óndirisi salasynyń 8,2%-ǵa deiingi boljamdy ósimi men óńdeý ónerkásibiniń 4,5%-ǵa deiingi kútiletin ósimi esebinen 6,2%-ǵa deiin ulǵaitylady dep qaita qaraldy.
Munai óndirý kólemi iri ken oryndarynda (Qashaǵan, TShO, Qarashyǵanaq) óndirý josparyn asyra oryndaý esebinen 81-den 84,5 mln tonnaǵa deiin ulǵaityldy. Aýyl sharýashylyǵynyń jalpy ónim kóleminiń ósimi 2,5% deńgeiinde saqtalǵan.
Ekonomikalyq belsendiliktiń jaqsarýy men eksporttalatyn taýarlarǵa álemdik baǵanyń turaqtaýyn eskere otyryp, eksport boiynsha boljam $1,9 mlrd-qa $47 mlrd-qa deiin uiǵaiǵan, import maquldanǵan $32,7 mlrd deńgeiinde saqtaldy.
Túzetilgen makroekonomikalyq boljam negizinde 2017 jylǵa arnalǵan respýblikalyq biýdjet parametrleriniń boljamy da naqtylandy. Respýblikalyq biýdjettiń 2017 jylǵy kiristeri (transfertterdi esepke almaǵanda) 4 952,8 mlrd teńge kóleminde baǵalanady, bul bekitilgen jospardan 60,8 mlrd teńgege joǵary kórsetkish.
Jer qoinaýyn paidalanýshylardan túsetin korporativtik tabys salyǵy boiynsha, sonymen qatar memlekettik kásiporyndar kirisiniń bir bóligi men dividentterdiń josparlanbaǵan túsimderi esebinen salyqtyq emes túsimder boiynsha negizgi asyra oryndaý oryn alady dep kútilýde.
Sonymen qatar úkimettik qaryz ósimin shekteý jáne elimizdiń táýelsiz reitingin saqtaý maqsatynda biýdjet tapshylyǵyn 47,9 mlrd teńgege nemese JIÓ 3,1%-dan 2,9%-ǵa deiin qysqartý usynylǵan.
Ulttyq qordyń kepildi jáne maqsatty transfertteri buǵan deiin bekitilgen kólemde saqtalǵan.
