Elimizde sailaýaldy úgit-nasihat jumystarynyń bir aptasy qorytyndylandy. Prezidenttikke kandidattar pen olardyń senim bildirilgen adamdary biraz óńirdi aralap, sailaýaldy tuǵyrnamalaryn tanystyrdy.
«Aq jol» demokratiialyq partiiasynan prezidenttikke kandidat Daniia Espaeva úgit-nasihat jumystarynyń aiasyndaǵy kezekti saparyn Qostanai oblysyna jasady. Kandidatpen qatar nasihatshylar tobynda respýblikalyq shtab músheleri – partiia tóraǵasynyń orynbasary Dmitrii Vasilev, Parlament Májilisiniń depýtaty Erlan Barlybaev jáne «Aq jol» partiiasynyń aimaqtyq belsendileri boldy.
D.Espaeva bastaǵan delegatsiia aldymen Altynsarin aýdanyna taban tiredi. «Olja-Beliavka» – aýdandaǵy iri seriktestikterdiń biri. Mamyr aiy – qostanailyq diqandar úshin qyzý naýqan kezi. Egistiktiń jalpy aýdany 145 myń gektar, onyń ishinde 111 myńy egis alqaby bolsa, 34 myńy – jaiylym. 2019 jylǵy egis alaby 66 myń gektardy quraidy. Seriktestikte 600-ge tarta jumysker qyzmet etedi. Daniia Espaeva mehanizator, prorab, motoristermen mashino-traktor sheberhanasynda sóilesip, aýyl azamattaryn qandai másele mazalaitynyn bildi. «Mundai kezdesýlerdiń orny bólek. Búgingi tańda Qazaqstan halqynyń 43 paiyzy aýyldyq jerde turady. Maǵan kandidat retinde sizderge aýyl sharýashylyǵyn damytý jónindegi ustanymymdy jetkizý mańyzdy boldy. Sebebi aýyldaǵylardyń eńbegi qarjylai laiyqty baǵalanyp, fermerlik sharýashylyqtaǵy jumyskerler qalalyq kásiporyndardan az jalaqy almaýy tiis. Osylai ǵana biz ómir súrý kórsetkishin kóterip, jastardy syrt jaqqa emes, óz aýyldarynda eńbek etýge qyzyqtyra alamyz», dedi partiia kandidaty.
Budan keiin kezdesý Selantev orta mektebinde jalǵasty. Onda kóbine aýyl infraqurylymyn jaqsartý týraly talqylandy. Óńirdi aralaý munymen shektelmei, kandidat «Saryarqa AvtoProm» jáne «Agromashholding» kásiporyndaryna da baryp, sailaýshylarǵa sailaýaldy baǵdarlamasyn keńinen tanystyrdy. Sońynda Qostanai qalasyndaǵy M.Gorkii atyndaǵy mektep-gimnaziiaǵa soqty.
* * *
«Aýyl» halyqtyq-demokratiialyq patriottyq partiiasynan kandidat Tóleýtai Rahymbekovtiń sailaýaldy baǵdarlamasy Qyzylordadaǵy Qazaq kúrish ǵylymi-zertteý institýtynda qyzý talqylandy. Ásirese agrarlyq ǵylymdy damytý, selektsiialyq ortalyqtardy qoldaý jáne zamanaýi jabdyqtarmen qamtamasyz etý máseleleri óte ózekti ekeni atalyp ótti. Atalǵan institýttyń direktory mindetin atqarýshy Baqytjan Dúisenbekov bul baǵdarlamanyń kóńilden shyqqanyn aityp, Elbasynyń «Aýyl sharýashylyǵy – bizdiń ekonomikamyzdyń draiveri» degen sózin eske saldy.
Al kandidattyń Batys Qazaqstan oblysyndaǵy senim bildirilgen adamdary «KazConstruction Group» ujymymen kezdesti. Onda Jáńgir han atyndaǵy Batys Qazaqstan agrarlyq-tehnikalyq ýniversitetiniń dotsenti, aýyl sharýashylyǵy ǵylymdarynyń kandidaty Bolatqali Tólebaev prezidenttikke kandidattyń basty ustanymdary týraly onyń áleýmettik jelilerdegi jeke paraqshalary jáne saity arqyly ár sailaýshynyń tanysýǵa múmkindikteri zor ekenin aitty. Onda kandidat agrarlyq sala, turǵyn úi-kommýnaldyq sharýashylyǵy, ekologiia, jalpy el ekonomikasynyń qazirgi jaǵdaiyn, problemalaryn jáne olardy sheshýdiń naqty joldary týraly oi bólisken.
Sondai-aq úgit-nasihat naýqanynyń aiasynda óńirlerde «Óz talyńdy otyrǵyz!» atty ekologiialyq aktsiialar uiymdastyryldy. Elimizdiń túkpir-túkpirinde belsendi jastar aǵash egip, qala kóshelerin jasyl jelekke bóledi. Atap aitsaq, Túrkistan, Shymkent, Qostanai, Taldyqorǵan qalalarynda ótken qoǵamdyq jumysqa jastar bilek sybana kiristi. Sharaǵa qatysýshylar óz shaharlaryn kógaldandyrýmen qatar, saiabaqtar men qoǵamdyq oryndardy tazalady. Aktsiia barysynda «Aýyl» partiiasy atynan saiasi naýqanǵa qatysatyn kandidattyń baǵdarlamasy tanystyryldy.
* * *
Kásipodaqtar federatsiiasynan prezidenttikke kandidat retinde usynylǵan Amangeldi Taspihovtyń aimaqtardaǵy qoǵamdyq shtabtary belsendi jumys istep jatyr. Mańǵystaý oblysyndaǵy qoǵamdyq shtabtyń jetekshisi Kiikbai Jaýlin men kásipodaq ardageri Marat Dáýletov «CaspiBitum» kásipornynyń eńbek ujymymen jiyn ótkizdi. Onda kandidattyń senim bildirgen adamdary A.Taspihovtyń sailaýaldy tuǵyrnamasyn jáne ómirbaianyn tanystyrdy. Ásirese jumys ornyndaǵy eńbek qaýipsizdigi jáne eńbekti qorǵaý týraly bólimin keńinen qozǵap, jinalǵandardyń birqatar suraǵyna jaýap berdi.
Al Batys Qazaqstan oblystyq bilim jáne ǵylym qyzmetkerleri kásipodaǵy Qazaqstan halqy Assambleiasy úiinde «Búgingi kásipodaqqa – belsendi jastar» atty seminar-trening ótkizdi. Is-sharada kásipodaqtyń belsendi jastaryn marapattap, artynan prezidenttikten úmitker A.Taspihovtyń sailaýaldy tuǵyrnamasy týraly baiandaldy. Onda jastar elimizdiń qozǵaýshy kúshi retinde baǵalanyp, olardy daýys berý naýqanynan qalys qalmaýǵa shaqyrdy.
Kandidattyń Qyzylorda oblysy boiynsha óńirlik shtabynyń basshysy, aýmaqtyq kásipodaqtar birlestiginiń tóraǵasy Serik Sermaǵambetov oblystyq tarihi ólketaný mýzeii eńbek ujymymen kezdesti. Jiynda senim bildirilgen ókil kópshilikke A.Taspihovtyń tulǵasyn jan-jaqty tanystyryp, tarihi mańyzdy saiasi naýqanmen tustas kelgen 18 mamyr – Halyqaralyq mýzei kúnimen quttyqtady.
Sondai-aq Túrkistan oblysy jáne Shymkent qalasyndaǵy qoǵamdyq shtab basshysynyń orynbasary Serik Áýeshanov bastaǵan top «PetroKazahstan Oil prodakts» kásipornynda boldy. Onda kandidattyń sailaýaldy baǵdarlamasynan úzindi oqylyp, bul jolǵy saiasi dodanyń erekshelikteri talqylandy.
* * *
Elordada Qazaqstan Kommýnistik halyq partiiasynan kandidat Jambyl Ahmetbekovti qoldaýǵa arnalǵan avtosherý ótti. Oǵan prezidenttikten úmitker Jambyl Ahmetbekov pen respýblikalyq sailaýaldy shtabtyń jetekshisi Aiqyn Qońyrov qatysty. 30 kólikten quralǵan shep QKHP respýblikalyq shtabynan bastaý alyp, halyq kóp shoǵyrlanǵan jerlermen júrip ótti. Kommýnistik nyshandarmen jáne qyzyl týmen bezendirilgen kólikter tizbegi jolai kezdesken kólik júrgizýshileri men qala tuǵyndarynyń nazaryn erekshe aýdardy.
«Bul is-shara kommýnister erekshe qadirleitin Pionerler kúni qarsańynda ótti jáne osy merekeniń qurmetine arnaldy. Bul kúnniń kommýnister úshin mańyzy zor. Sondyqtan biz Pionerler kúnin avtosherýmen atap ótýdi jón kórdik. Avtosherý qalanyń negizgi kóshelerinen ótti. Osylaisha biz óz jumysymyzǵa qala turǵyndarynyń nazaryn aýdarttyq. Shara sheńberinde qalyń kópshilikke partiianyń sailaýaldy baǵdarlamasy túsindirilip, úgit paraqtary taratyldy. Bizdiń partiia eńbek adamynyń múddesin qorǵaidy. Biz – halyq jaqtaýshylarynyń partiiasy, 15 jyldan asa ýaqyt birneshe mańyzdy baǵyttarda jumys istep kelemiz. Biz Qazaqstannyń kóptegen sailaýshylary bizdiń ekonomikadaǵy, áleýmettik-saiasi ómirdegi ustanymymyzdy qoldaitynyna senemiz», dedi J.Ahmetbekov.
* * *
Nur Otan partiiasynan prezidenttikke kandidat Qasym-Jomart Toqaevtyń respýblikalyq qoǵamdyq shtabynyń músheleri Qostanai oblysyna atbasyn burdy. Bul óńir bitik eginimen birge iri óndiris oryndarymen de belgili. Solardyń biri – «Sokolov-Sarybai» taý-ken baiytý óndiristik birlestigi. Nasihatshy top kásiporynnyń eńbek ujymymen kezdesip, Q.Toqaevtyń sailaýaldy baǵdarlamasynyń máni men mańyzy týraly aitty. Atap aitqanda, olar kandidattyń baǵdarlamasy sabaqtastyq, ádildik jáne órleý degen qaǵidalarǵa negizdelgeni, sol arqyly Elbasy jolyn jalǵastyrýdy, barshaǵa birdei teń múmkindik jasaýdy jáne qarqyndy damýdy maqsat tutyp otyrǵany sóz boldy.
Sonymen qatar shtab ókilderi «Baian sulý» konditerlik fabrikasynyń eńbek ujymymen kezdesti. Onda otandyq óndiris pen shaǵyn jáne orta biznesti damytý Q.Toqaevtyń basty ustanymy ekeni aityldy. «Otandyq iri kásiporyndar men shaǵyn jáne orta biznesti qoldaý – kandidatymyzdyń basym baǵyttarynyń biri. Onyń barlyq strategiialyq maqsattarynyń sapaly ári ýaqtyly júzege asyrylýy úshin bizdiń partiia bar kúsh-jigerin jumsaidy», dedi Máýlen Áshimbaev.
Jalpy bes kúnde shtab músheleri myńdaǵan shaqyrym jol júrip, Qaraǵandy, Pavlodar, Aqmola, Soltústik Qazaqstan jáne Qostanai oblystarynda boldy. Partiialyqtar 12 qala jáne onshaqty eldi mekendi aralady. 32 aýqymdy is-shara ótti. Aýqymdy sharaǵa 14 myńnan asa sailaýshy qatysyp, Qasym-Jomart Toqaevtyń kandidatýrasyn qyzý qoldady.
* * *
«Ult taǵdyry» ulttyq-patriottyq qozǵalysynan kandidat retinde tirkelgen Ámirjan Qosanov Almaty qalasynda turǵyndarmen jáne qalalyq shtab belsendilerimen kezdesti. Basqosýdy Almaty qalasynyń sailaýaldy shtaby uiymdastyryp, respýblikalyq shtab jetekshisi Dáýren Babamuratov júrgizdi. Is-sharada kandidat sailaýaldy tuǵyrnamasyn tanystyryp, túrli ózekti qoǵamdyq máselelerge qatysty óz ustanymyn jetkizdi. Qatysýshy turǵyndar ózderin tolǵandyrǵan saýaldaryn qoiyp, úmitkerge tilekteri men qoldaýyn bildirdi.
Sondai-aq úgit-nasihat jumystary Óskemen qalasynda jalǵasyn taýyp, aimaqtaǵy qoǵamdyq shtab belsendileri oblys ortalyǵynyń damyp kele jatqan bir aýdanynda «Qalany kógaldandyrý» is-sharasyn uiymdastyrdy. Atalǵan aktsiia barysynda qala turǵyndary arasynda sailaý aldyndaǵy úgit-nasihaty júrgizilip, jańa aýdanda aǵashtar otyrǵyzyldy. Sonymen qatar keibir turǵyndar kandidattyń sailaýaldy tuǵyrnamasynyń baǵyttarymen tanysyp, shtab belsendileriniń qalany kógaldandyrýǵa arnalǵan baǵyttaryn quptady.
Buǵan qosa 17 mamyr kúni saǵat 16.00-de prezidentikke kandidat Á.Qosanov taǵy da áleýmettik jelilerde tikelei efirge shyqty. Jarty saǵatqa sozylǵan transliatsiialar Instagram, Facebook jáne YouTube jelilerinde ótti. Kandidat óziniń sailaýaldy tuǵyrnamasynda kórinis tapqan «Saiasi bostandyqtar» taqyrybyn egjei-tegjeili ashty. Habar taratý orys tilinde sóileitin aýditoriiaǵa arnaldy. Ótken efirde bul taqyryp boiynsha ol qazaq tildi aýditoriia úshin sóz sóilegen edi. Kandidat kórermenderdiń saiasi-áleýmettik suraqtaryna jaýap berip, olar ataǵan máseleler týraly pikir bildirdi. Endi kelesi efir shamamen 20 mamyrda saǵat 16.00-de ótkiziledi dep josparlanyp otyr.
* * *
«Uly dala qyrandary» respýblikalyq qozǵalysynan prezidenttikke kandidat Sádibek Túgel Býrabai aýdanynda ornalasqan Kenesary úńgirine bardy. «Kenesary han – qazaq tarihynda sońǵy han ǵana emes, ult azattyǵy jolynda qaitpas qaisarlyǵy men órshil rýhymen halyq júreginen oiyp oryn alǵan tulǵa. Myna úńgirden ainala alaqandaǵydai kórinip tur. Jergilikti kónekóz qariialardan bizge jetken áńgimelerde otarlaý saiasatyna qarsy shyqqan batyr senimdi serikterimen osynda jinalyp, aldaǵy áskeri mańyzdy josparlaryn aityp aqyldasqan eken. Búgin Kenesarydai ataqty, erligi ańyz, órligi ónege bolǵan hannyń úńgirine sizderdi alyp kelip, ózim aldaǵy mańyzdy kezeńniń aldynda turyp, batyrdyń rýhy aldynda bas iip, quran baǵyshtasaq dep oilap edim», dedi ol ózimen birge júrgen sailaýaldy shtabyndaǵy ókilderine.
Odan keiin elordaǵa oralyp, «Ulttyq qundylyqtardy ulyqtaiyq!» atty dóńgelek ústel jiynyn ótkizdi. Otyrysta S.Túgel sailaýaldy baǵdarlamasynda memlekettik tildiń mártebesin kóterý, ulttyq salt-dástúrdi, ulttyq at sporty oiyndaryn damytý, jemqorlyqqa tosqaýyl, demografiia máselesine zor kóńil bólý baǵyttary kórsetilgenin, munyń barlyǵy jas urpaq tárbiesinde ózekti ekenin aitty.
«Biz jas urpaqty ulttyq múddeni qorǵaýǵa baǵyttaýymyz úshin olardyń boiyna eń aldymen ádildikti ornyqtyrýymyz qajet. Ózim jyldar boiy Joǵarǵy sotta sýdia bolyp qyzmet atqarǵandyqtan, jas býyn qoǵamdy ishinen jegidei jeitin jemqorlyqtan boilaryn aýlaq salyp, izgilik pen adamgershilikti basty ustanym etip ósse dep oilaimyn. S.Túgeldiń buǵan deiin de atqarǵan jumystarynyń basy-qasynda júrdim, bul joly da bastamasyn qoldaimyn», dedi kandidattyń senim bildirilgen adamy, sot salasynyń eńbek sińirgen qyzmetkeri Talǵat Omar.
