Qazaqstan prezidenti Nursultan Nazarbaevtyń AQSh-qa sapary qarsańynda AQSh memleket hatshysynyń Ortalyq Aziia jáne Ońtústik Aziia boiynsha kómekshisi Elis Ýells jýrnalistermen telefon konferentsiiasyn ótkizdi, dep habarlaidy "Ult aqparat" Azattyqqa silteme jasap.
Astana ýaqytymen 17:00-de bastalǵan telefon konferentsiiasyna Qazaqstan men Qyrǵyzstan jýrnalisteri qatysty.
Elis Ýellske negizinen Amerikanyń Qazaqstan jáne Ortalyq Aziiamen saiasi-ekonomikalyq qarym-qatynasy jaiynda suraqtar qoiyldy.
Kirispe sózinde Elis Ýells: "prezident Nursultan Nazarbaevty qabyldaitynymyzǵa qýanyshtymyz" dedi.
Ýells Amerikadaǵy kezdesý kezinde Tramp pen Nazarbaev arasynda qandai áńgime bolatynyn da aitty.
- Biz Qazaqstanmen ekonomikalyq diversifikatsiiany keńeitýge bailanysty áńgimeni jalǵastyramyz. Qonaqjai, isker klimattyń qalyptasýyn qoldaimyz. Óitkeni Qazaqstanǵa sheteldik investitsiianyń tartylýyna dál osy jait sebep. Amerikalyq investorlar memleketke qarjy salar kezde birinshi kezekte osy elde jumys istep jatqan kompaniianyń jetistikterine kóńil aýdarady. Sondyqtan, biz kelisim-sharttarǵa degen qurmetti qamtamasyz etýge jáne bar máselelerdi sheshýge tyrysamyz, - dedi Ýells.
Konferentsiia barysynda Qyrǵyzstan, Ózbekstan men Aýǵanstan memleketteri jaiynda da áńgime boldy.
AQSh memleket hatshysynyń kómekshisi Amerikanyń «Ortalyq jáne Ońtústik Aziia strategiialyq kelisimi negizinde árdaiym Ortalyq Aziiadaǵy ekonomikalyq bailanysty qoldaitynyn» málimdedi. Ókil Ózbekstannyń aimaqta mańyzdy ekonomikalyq ról atqaratynyn, Qyrǵyzstannyń sóz bostandyǵy turǵysynan óńirde kóshbasshy ekenin, al, Aýǵanstannyń bolashaǵy Ortalyq Aziiamen birigip qimyldaýyna bailanysty ekenin atap ótti.
Esterińizge sala keteiik, Qazaqstan Prezidenti Nursultan Nazarbaev 16-18 qańtar kúnderi AQSh-qa resmi saparmen barady. Sapar aiasynda AQSh prezidenti Donald Tramppen jáne osy eldiń resmi, isker top ókilderimen kezdesip, BUU Qaýipsizdik Keńesiniń otyrysyna qatysý josparlanǵan.
