UBT-nyń jańa formatynda mindetti pán retinde oqý saýatyn tekserý paida boldy, - dep habarlaidy Tengrinews.kz tilshisi. Sondai-aq, tańdalatyn taǵy bir pán qosylyp otyr.
"Mekteptegi qorytyndy attestatsiiada tórt mindetti pán men bir tańdaý páni bolady. Mindetti pánderdiń qatarynda orys nemese qazaq tilinde tapsyrady jáne ádebietten esse formasynda tapsyrady, al Qazaqstan tarihy aýyzsha emtihan retinde, matematika - baqylaý jumysy, sonymen qatar, oqý tili boiynsha testileý bolady (qazaq tilinen testileý - orys mektepterinde jáne orys tilinen testileý qazaq, uiǵyr, ózbek jáne tájik tilinde bilim alǵandar úshin). Tańdaý páni de testileý boiynsha tapsyrylady - fizika, himiia, biologiia, geografiia, geometriia, dúniejúzi tarihy, ádebiet nemese shetel tili", - dedi ortalyq kommýnikatsiialar qyzmetindegi brifingte QR BǴM Mektepke deiingi jáne orta bilim berý departamentiniń direktory Jańyl Jontaeva.
QR Bilim jáne ǵylym ministrliginiń joǵary jáne joǵary oqý ornynan keiingi bilim departamentiniń direktory Darhan Ahmet-Zákidiń aitýynsha, JOO-ǵa túsýshilerge UBT-ny tapsyrýdyń jańa formaty úsh mindetti pándi qarastyrady: matematikalyq saýat, saýatty oqý jáne Qazaqstan tarihy, 20 suraqtan turatyn emtihan jáne 30 suraqtan eki beiindi pán bolady. Testileýdiń jalpy ýaqyty - 210 minýt. QR BǴM suraqtardyń sany artqanymen, shektik balldy 50 deńgeiinde qaldyryp otyr.
"Saýatty oqý - bul tórt mátin, onyń árqaisysy boiynsha bes balldan beriledi, olar jalpy taqyrypta bolady, talapker ony oqyp, saraptama jasap, mátindik suraqtarǵa bailanysty mátinde keltirilgen jaǵdaiǵa qatysty jaýap berýi tiis. Jalpy bul SIT (System Integration Test - Avt.) júiesinen alynǵan. Bul emtihan arqyly jaǵdaiǵa syni kózqaraspen qaraý, saraptama jasai alýyn tekserýge baǵyttalǵan", - dedi Darhan Ahmet-Zaki.
"JOO-ǵa túsýshilerge arnalǵan UBT 20 maýsym men 1 shilde aralyǵynda ótedi, testileýge qatysýǵa ótinim 10 naýryzdan 10 mamyrǵa deiin qabyldanady eken. Sondai-aq, shektik deńgeige baly jetpegen túlekter UBT-ny tamyzda nemese kelesi jyldyń qańtarynda qaita tapsyra alady", - dedi QR BǴM Bilim jáne ǵylym salasyndaǵy baqylaý jónindegi komitettiń tóraǵasynyń orynbasary Nurbek Orshýbekov.
Osyǵan deiin QR BǴM ókilderi 2017 jylǵy túlekterge UBT-nyń ekige bólinetinin jariialaǵan bolatyn. Olar: mektepterdegi memlekettik emtihan formatyndaǵy qorytyndy attestatsiia jáne tańdalǵan mamandyqqa bailanysty 14 pánnen eki beiindi páni boiynsha UBT.
Aita keteiik, UBT engizilgeli 13 jyldan beri oǵan 1,5 million bala qatysqan.
