Kelesi oqý jylynan bastap IT salasyndaǵy mamandyqtardy meńgergisi talapkerler UBT-da fizika emes, informatika páninen test tapsyrady.
BǴM baspasóz qyzmeti ministrlikke joǵary oqý oryndarynda IT-baǵyttar boiynsha oqyǵysy keletin talapkerler úshin UBT-nyń beiindi pánder tizimine "Informatika" pánin engizý jaily kóptegen ótinish kelip túsetinin atap ótti.
"Osyǵan bailanysty ministrlik taldaý júrgizip, 2022-2023 oqý jylynan bastap «Informatika muǵalimderin daiarlaý», «Aqparattyq tehnologiialar» jáne «Aqparattyq qaýipsizdik» bilim berý baǵdarlamalary toptaryna túsetin oqýshylar UBT-da «Matematika+Fizika» ornyna «Matematika+Informatika» kombinatsiiasyn tapsyrady degen sheshim qabyldady", - dep málimdedi vedomstvo.
2021-2022 oqý jylynda beiindik pán «Fizika» bolyp qala beredi, bul rette pilot retinde talapkerlerdiń tańdaýy boiynsha biyl osy daiyndyq baǵyttaryna (naýryzdaǵy UBT kezinde) túsý úshin «Matematika +Informatika» kombinatsiiasyn tańdaý optsiiasy qosymsha qoljetimdi bolady.
