10 mamyrda Ulttyq biryńǵai testileýge qatysýǵa ótinishterdi qabyldaý aiaqtaldy. Bul týraly Ulttyq testileý ortalyǵynyń resmi saitynda habarlandy.
Aqparatqa sáikes, 1 sáýir men 10 mamyr aralyǵynda UBT-ǵa ótinimder kelesi qatysýshylardan qabyldandy:
- qalaýy boiynsha respýblikalyq biýdjet nemese jergilikti biýdjet qarajaty esebinen bilim grantyn berý konkýrsyna qatysý úshin nemese JOO-ǵa aqyly negizde oqýǵa qabyldaný úshin nemese respýblikalyq biýdjet qarajaty esebinen memlekettik bilim berý tapsyrysy boiynsha oqý úshin orta bilim berý uiymdarynyń aǵymdaǵy jylǵy bitirýshilerinen;
- respýblikalyq biýdjet nemese jergilikti biýdjet qarajaty esebinen bilim grantyn berý konkýrsyna qatysý nemese JOO-ǵa aqyly negizde oqýǵa qabyldaný úshin orta bilim berý uiymdarynyń ótken jylǵy bitirýshileri men tehnikalyq jáne kásiptik nemese orta bilimnen keiingi bilim berý uiymdarynyń bitirýshilerinen;
- respýblikalyq biýdjet nemese jergilikti biýdjet qarajaty esebinen bilim grantyn berý konkýrsyna qatysý úshin joǵary bilimniń qysqartylǵan oqytý merzimderin kózdeitin bilim berý baǵdarlamalary boiynsha oqýǵa túsetin tehnikalyq jáne kásiptik nemese orta bilimnen keiingi bilim uiymdarynyń bitirýshilerinen.
Ulttyq testileý ortalyǵynyń málimetinshe, 10 mamyr men 5 maýsym aralyǵynda UBT-ǵa ótinishter qabyldaý jalǵasady. Biraq qujattardy kelesi sanattaǵy bitirýshiler ǵana tapsyra alady:
- respýblikalyq biýdjet nemese jergilikti biýdjet qarajaty esebinen bilim grantyn berý konkýrsyna qatysý úshin nemese JOO-ǵa aqyly negizde oqýǵa qabyldaný úshin halyqaralyq almasý jelisi boiynsha shetelde bilim alǵan orta bilim berý uiymdarynyń bitirýshileri men shetelde bilim alǵan, Qazaqstan Respýblikasynyń azamaty bolyp tabylmaityn, ulty qazaq azamattar.
Aita keteiik, UBT 2019 jylǵy 20 maýsym men 5 shilde aralyǵynda ótedi. Maýsym aiyndaǵy UBT sertifikaty bilim berý grantyn berý konkýrsyna qatysýǵa nemese joǵary oqý ornyna aqyly negizde qabyldanýǵa múmkindik beredi.
Ótinishter UBT ótkizý pýnktterinde jáne jelilik joǵary oqý oryndarynda qabyldanady.
Aǵylshyn tilin meńgergendigin rastaityn halyqaralyq sertifikattary bar tulǵalar «Shet tili (aǵylshyn tili)» páni boiynsha UBT-dan bosatylady.
«2019 jyldan bastap bilim granttary bilim berý baǵdarlamalarynyń toptary boiynsha beriletin bolady. Bilim berý baǵdarlamalarynyń tobyna birneshe baǵdarlama kiredi. Joǵary oqý ornyna qabyldaý kezinde oqýǵa túsýshiler odan ári oqý úshin naqty bilim berý baǵdarlamasyn tańdaidy. Túsýshilerdiń bilim berý granttaryn berý konkýrsy kezinde beiindik pánderi sáikes kelgen jaǵdaida 4 bilim baǵdarlamasy toptaryna deiin tańdaýǵa múmkindigi bar», - delingen ortalyq málimetinde.
Buǵan deiin habarlaǵanymyzdai, biyldan bastap bitirýshiler JOO-ǵa aqyly negizde túsý úshin UBT-ny jylyna 4 ret (qańtar, naýryz, maýsym, tamyz) tapsyra alady. Al grant boiynsha bilim alý úshin aldaǵy maýsym aiyndaǵy UBT-ǵa qatysý qajet.
