Qazaqstannyń Bas prokýratýrasy men Ishki ister ministrliginiń Interpol Ulttyq ortalyq biýrosy Albaniia Respýblikasynan birneshe márte alaiaqtyq jasady degen kúdikke ilingen Qazaqstan azamatyn elge ekstraditsiialady, dep habarlaidy ult.kz.
Bas prokýratýranyń baspasóz qyzmetiniń málimetinshe, 2022–2023 jyldary kúdikti internet arqyly joǵary synyp oqýshylaryna Ulttyq biryńǵai testileýge sapaly daiyndaitynyn jáne joǵary oqý oryndaryna kepildikpen túsiretinin aityp, jalǵan aqparat taratqan.
Onyń ýádesine sengen 32 azamat qyzmet aqysyn tólegenimen, ýáde oryndalmaǵan. Sonyń saldarynan jábirlenýshilerge keltirilgen jalpy materialdyq shyǵyn 28 million teńgeden asty.
Qylmys jasalǵannan keiin kúdikti Qazaqstannan qashyp ketken. Keiin oǵan halyqaralyq izdeý jariialanyp, 2025 jyldyń mamyr aiynda Albaniiada ustaldy. Qazaqstan Bas prokýratýrasynyń suraý salýy negizinde ol elge ekstraditsiialandy.
Qazir kúdikti tergeý izoliatoryna qamaldy.
Atalǵan qylmys boiynsha kinási dáleldengen jaǵdaida onyń múlki tárkilenip, 3 jyldan 10 jylǵa deiin bas bostandyǵynan aiyrylýy múmkin.
