Qazaqstannyń bas sanitarlyq dárigeri Jandarbek Bekshin UBT ótkizýge qatysty keńester berdi. Bul adamnyń kóp jinalýyna bailanysty meningokokk infektsiiasynyń jańa tolqyny týdyrmas úshin aityldy, - dep habarlaidy "Ult aqparat".
"Maýsymnyń 20-y men 30-y aralyǵy Ulttyq biryńǵai testileý ótedi. Shara 147 orynda uiymdastyrylady. JOO, kolledjder men shalǵai aýdandardaǵy mektepterde arnaiy aýditoriia bólinedi. Osyǵan bailanysty Bilim ministrligimen aldyn alý máselesin talqylap jatyrmyz. Adamdardyń kóp bolatynyn túsinemiz, synaq uzaqtyǵy – 3 saǵat 50 minýt, uiymdastyrý jumystaryn qosa alǵanda tórt saǵatqa deiin sozylady. Sol sebepti biz UBT uiymdastyrýshylaryna synaq bastalmai turyp bólmeni jaqsylap jeldetip, zararsyzdandyrǵysh zattarmen jýyp-tazalaýǵa keńes berdik. Bul jumystar kezinde terezeler ashyq bolǵany durys", - dedi Bekshin OKQ-daǵy brifing kezinde.
Onyń sózinshe, testileý meditsinalyq qyzmetkerlerdiń baqylaýymen ótedi jáne barlyq jerde dári-dármekter bolady.
Sonymen birge, Bekshin testileýge keletin bitirýshilerdiń turatyn jáne tamaqtanatyn oryndaryna qatysty sanitarlyq baqylaý týraly aitty.
"Mundai sharalar meningitke shaldyǵýdyń jańa jaǵdailaryn boldyrmaýǵa kómektesedi degen oidamyn", - deidi ol.
Bas sanitarlyq dáriger qazir Qazaqstanda meningit boiynsha ahýal turaqty ekenin atap ótti.
"Desek te, áli de em qabyldap jatqan naýqastar bar. Jalpy qazir 20 adam emdelýde: onyń 13-i Almatyda, Almaty oblysy men Astanada úsh naýqas, Qaraǵandy oblysynda bir adam" – dedi ol.
Sondai-aq, óńirlik call-ortalyqtarda qaýyrt jeli jumys isteidi. Ótken táýlikterde úsh myńnan astam qońyraý túsip, barlyǵyna jaýap berildi, dep tolyqtyrdy Bekshin
