UBT aiaqtalǵannan keiin testileý kezindegi videomaterialdar biraz ýaqyt boiy tekserýden ótkizilip, kóshirýmen ainalysqan túlekterdiń jinaǵan upaiy joiylady. Bul týraly «Birge oqý» jobasynyń arnalary arqyly ótken tikelei efirde «Ulttyq testileý ortalyǵy» RMQK direktorynyń orynbasary Naýjan Didarbekova málim etti, dep habarlaidy QazAqparat.
«Osy jyldaǵy taǵy bir jańalyǵymyzǵa toqtalsaq, Ulttyq biryńǵai testileý aiaqtalǵannan keiin bizde aýditoriialardaǵy videomaterialdarǵa taldaý jasalady. Eger osy beinejazbalar barysynda testilenýshiniń tyiym salynǵan zatty (smartfon jáne ózge de qurylǵylar) paidalanǵanyn anyqtasaq, onyń testileý nátijesin (sertifikatty) joiatyn bolamyz. Atap aitqanda, ol bilim berý grantynyń konkýrsyna qatysyp, grant alǵan jaǵdaida, onyń konkýrs nátijelerin joiý múmkindigi bar», - dedi Naýjan Didarbekova.
Osy oraida Ulttyq testileý ortalyǵynyń ókili UBT tapsyrý kezinde barsha túlekterdi ashyq ári adal bolýǵa shaqyrdy.
Budan buryn habarlanǵandai, UBT-da zańsyz áreket jasaǵandar jyl boiy testileý tapsyrý múmkindiginen aiyrylady.
