Elimizde ótip jatqan Ulttyq biryńǵai testileýdiń alǵashqy leginde 3400-den astam túlek eń tómengi baldy eńsere almady, dep habarlaidy QazAqparat tilshisi.
Búgin elordadaǵy Ortalyq kommýnikatsiialar qyzmetinde UBT-nyń birinshi kúnindegi nátijeler qorytyndylandy.
QR Bilim jáne ǵylym ministrliginiń joǵary oqý ornynan keiingi bilim berý departamentiniń direktory Ádilet Toibaevtyń aitýynsha, UBT-nyń alǵashqy kúninde respýblika boiynsha 12 772 túlek baqtaryn synaǵan.
«Jalpy birinshi lekte test tapsyrýǵa 13068 túlek ótinish berdi. Sonyń 97 paiyzy synaqqa qatysty. Onyń ishinde 11 361 túlek - qazaq tilinde, 1411 túlek - orys tilinde. UBT elimizdiń 6 óńirinde ótti. Atap aitqanda, Nur-Sultan qalasy jáne Almaty, Aqtóbe, Atyraý, Mańǵystaý jáne Túrkistan oblystarynda barlyǵy 39 test tapsyrý beketi jumys istedi», - dedi ministrlik ókili.
Ádilet Toibaevtyń sózinshe, biylǵy testileýdiń qorytyndysy boiynsha mektepter men óńirlerdiń ortasha kórsetkishi eseptelmeidi jáne reitingi qurylmaidy.
«Ministrdiń Úkimet otyrysynda UBT nátijelerin reitingterge qospaý usynylǵanyn bilesizder. Jergilikti ákimdikter arasynda negizsiz báseke bolmaý úshin osyndai qadamǵa baryp otyrmyz. Óitkeni, UBT nátijesi qandai da bir reiting túzý úshin ótkizilmeidi. UBT-nyń shektik deńgeiinen súrinbei ótken túlekter sany - 9338. Bul - 76,5 paiyz degen sóz. Al shektik baldy jinai almaǵan túlekter sany - 3434», - dedi departament basshysy.
BǴM ókiliniń aitýynsha, UBT engizilgen 16 jyldyń ishinde 1,7 mln túlek synaq tapsyrǵan.
«Jalpy UBT-nyń birinshi legi shatattyq jaǵdaida, qalypty ótti deýge bolady. Ázirge eń joǵary kórsetkish - 137 ball. Erekshe bilim berý qajettigi bar 5 oqýshy da baǵyn synady. Olarǵa barlyq tiisti jaǵdai jasaldy. UBT-nyń tártipke sai ótýin 500-ge jýyq baiqaýshy qadaǵalady. Sol siiaqty barlyq test tapsyratyn 339 aýditoriiada beinebaqylaý ornatylǵan. Keshe testileý ótken pýnktterdiń barlyǵynan ministrliktiń resmi saity men YouTube kanalynda tikelei kórsetilim júrdi. Testileý ótken oryndardyń barlyǵynda uialy bailanys buǵattaldy», - deidi Ádilet Toibaev.
Ministrlik taratqan qosymsha aqparatqa súiensek, túlekter arasynda ázirshe tehnikalyq mamandyqtardy qamtityn oqý baǵdarlamalaryna suranys joǵary.
«Matematika-fizika baǵdarlamalyq kombinatsiiasyn 3963 bala, himiia-biologiia kombinatsiiasyn 2683 oqýshy tańdaǵan. Birinshi lektiń túlekteri arasynda himiia-fizika kombinatsiiasyna eń az suranys tirkeldi», - delingen resmi málimette.
