Foto: ashyq derekkóz
Qazaq ulttyq qyzdar pedagogikalyq ýniversitetiniń Basqarma Tóraǵasy – Rektory Beibitkúl Kárimova Qyzylordada ótken Ulttyq quryltaidyń besinshi otyrysyna qatysty pikir bildirdi, dep habarlaidy Ult.kz.
"Qyzylordada ótken Ulttyq quryltaidyń besinshi otyrysy – el damýynyń jańa kezeńine bastar taǵdyrly sátterdiń biri boldy. Memleket basshysy Qasym-Jomart Toqaevtyń bastamasymen qaita jańǵyrǵan bul jalpyulttyq dialog alańy qysqa ýaqyt ishinde el taǵdyryn aiqyndaityn strategiialyq sheshimder qabyldanatyn, qoǵam men memlekettiń shynaiy suhbaty ornyqqan mańyzdy institýtqa ainaldy.
Eldik máni bar máselelerdiń dál Syr boiynda talqylanýy – shaharymyzdyń tarihtaǵy, rýhaniiattaǵy jáne qazirgi áleýmettik-ekonomikalyq damýyndaǵy erekshe ornyna berilgen joǵary baǵa. Bul – óńirge kórsetilgen senim ǵana emes, el bolashaǵyn birge aiqyndaýǵa shaqyrǵan jaýapkershilik.
Memleket basshysynyń 2025 jylǵy 30 qazandaǵy jumys sapary Qyzylordanyń damýy sóz júzinde emes, naqty istermen dáleldenip kele jatqanyn kórsetti: infraqurylym jańaryp, bilim men mádenietke serpin berilip, adami kapitaldy damytýǵa baǵyttalǵan júieli saiasat berik jolǵa qoiyldy.
Ulttyq quryltaidyń otyrysynda kóterilgen institýtsionaldyq reformalardy eldiń saiasi mádenietin jańa sapalyq deńgeige kóterýge baǵyttalǵan mańyzdy ári ýaqyt talabyna sai qadamdar dep baǵalaimyz. Jańa Parlamenttiń ókilettikterin naqtylaý, Prezident Ákimshiligin jańǵyrtý, apparattyq qurylymdardy ońtailandyrý jáne vitse-prezident institýtyn engizý jónindegi bastamalar bilik tarmaqtary arasyndaǵy jaýapkershilik pen basqarý tiimdiligin arttyrýǵa negizdelgen salmaqty sheshimder ekeni anyq. Bul bastamalar «kúshti institýttar – jaýapty memleket» qaǵidatynyń naqty is júzindegi kórinisi bolyp tabylady.
Sondai-aq Quryltaida kóterilgen tsifrlandyrý men jasandy intellekt máseleleri bilim berý júiesine tikelei qatysty. Qazirgi ýniversitet tek bilim taratýshy emes, tehnologiialyq ózgeristerdiń qozǵaýshy kúshi bolýy qajet. Osy turǵyda Memleket basshysynyń tsifrlyq transformatsiiaǵa belsendi qatysý týraly ustanymy joǵary bilim berý salasynyń damý baǵytymen tolyq úndesedi.
Qoǵamdyq kelisimdi nyǵaitý maqsatynda Qazaqstannyń Halyq Keńesin qurý bastamasy da – azamattyq qoǵamnyń rólin arttyrýǵa baǵyttalǵan mańyzdy qadam. Keń ókildilikke negizdelgen bul alań halyqtyń ártúrli toptarynyń pikirin eskerýge múmkindik beredi dep senemin.
Ulttyq quryltai el damýynyń jańa sapalyq kezeńine jol ashqan, saiasi reformalar, adami kapital jáne ornyqty damý máseleleri toǵysqan mańyzdy ulttyq alań ekenin taǵy bir márte dáleldedi. Mundai formattaǵy ashyq dialog qoǵamnyń memleketke degen senimin arttyryp, bolashaqqa baǵyttalǵan ortaq jaýapkershilikti kúsheitedi", - dep pikir bildirdi rektor.
