Saýda jáne integratsiia ministriliginde ýaqyt beldeýin ózgertýge qarsy petitsiia qaralyp jatyr, dep habarlaidy "Ult aqparat" Kazinform aqparat agenttigine silteme jasap.
Talqylaýda birinshi bolyp sóz alǵan Densaýlyq saqtaý ministriniń birinshi orynbasary Timýr Sultanǵaziev vedomstvo tarapynan bul másele boiynsha tiisti jumys tobyn qurylǵanyn aitty.
«Onyń quramyna ǵalym mamandar men dárigerler, meditsina ókilderi kirdi. Olar ýaqyt beldeýin ózgertý jónindegi sheteldik ǵylymi ádebietti, ózge elderdiń tájiribesin zertteý baǵytynda úlken jumys atqardy. Osy zertteýler negizinde ǵalymdar jasaǵan qorytyndy boiynsha, ýaqytty bir saǵatqa ózgertý men densaýlyqqa aitarlyqtai áseri arasynda eshqandai bailanys joq.
Sondai-aq, biz Dúniejúzilik densaýlyq saqtaý ministrligine de júgindik. Ondaǵy sarapshylar da osy máseleni talqylaý úshin óz pikirlerin aitty. Jalpy ǵalymdar adam densaýlyǵyna kún ýaqytyna barynsha jaqyn ýaqyt beldeýin turaqty qoldanýǵa keńes berip otyr. New England Journal of Medicine basylymynda jariialanǵan zertteýdi qysqasha baiandap shyǵýǵa ruqsat etińizder. Zertteý qysqy jáne jazǵy ýaqytqa 1 saǵat aiyrmashylyǵymen kóshý adamdardyń kópshiliginiń densaýlyǵynda aitarlyqtai buzylystarǵa ákelmeitinin kórsetken. Ýaqyt ózgerisine aǵza belgili bir ýaqyttyń ishinde uzaq merzimdi keri áserlersiz beiimdele alatyny aitylǵan», - dedi ol.
Vitse-ministr ýaqytty 1 saǵatqa jyljytý uiqyny retteitin gormon – melatonin óndirisinde minimaldy ózgerister týyndatady dep otyr.
«Journal of biological Britance-te jariialanǵan zertteý aǵza ýaqyttyń mundai jyljýyna 1-2 kúnde jáne birneshe aida beiimdeletinin kórsetti. Jańa ýaqyt kestesine melatonin deńgeii tez beiimdelip, qalypty uiqy rejimin qamtamasyz ete alatyny aitylǵan. Taǵy da atap ótkim keledi, tolyqqandy zertteý júrgizýge tym az ýaqyt ótti. Sonyń ózinde osy kezeńde meditsinalyq uiymdarǵa júginýshiler sany eshqandai ózgermegen. Halyqtyń densaýlyq jaǵdaiy aitarlyqtai ózgergen joq. Ýaqyt beldeýi ózgertilgennen beri qysqa ǵana kezeń ótkenin eskersek, basqa beldeýge kóshýdiń densaýlyqtaǵy eleýli ózgeristerge sebepker bolǵan-bolmaǵanyn anyqtaý úshin tiisti ǵylymi zertteýler kerek. Ministrlik ondai taldaý múmkindigin Ǵylym jáne joǵary bilim ministrligimen birlesip qaraýǵa daiyn», - dedi Timýr Sultanǵaziev.
