Foto: kino.kz
Qazir elimizde kino óndirisiniń qarqyny qatty ekeni barshaǵa belgili. Kinoteatrlarda kórsetiletin filmderdiń teń jartysy otandyq desek qatelespeimiz. Sońǵy jyldary jappai kino túsirý sánge ainalǵandai bola bastaǵanyna bireý narazy bolsa, bireýler qup kóredi. «Otandyq filmderdiń sany kóp, sapasy az ekeni ras. Biraq degenmen, bul da damýdyń belgisi» dep otyr jańadan shyqqan filmniń qoiýshy rejisseri.
«Selfi s prezdkami» atty balalarǵa arnalǵan horror-fentezi, iaǵni qorqynyshty qiial-ǵajaiyp filminiń 2 jeltoqsanda jabyq kórsetilimi ótip, úlken ekranǵa 5 jeltoqsanda jol tartpaq. Kino avtorlary bul balalarǵa arnalǵan fentezi janyryndaǵy filmderdiń alǵashqylarynyń biri, bundai janrda elimizde film az túsiriledi dep otyr.
Filmniń qoiýshy rejisseri Elaman Shalbanov balalarǵa arnalǵan kontent tapshylyǵyn sóz etip, balalar filmin túsirýdegi maqsatyn aitty.
«Osy filmdi túsirýdegi negizgi maqsatymyz ideia turǵysynda emes, balalarǵa jaqsy kontent usyný boldy. Sebebi qazir jetkinshekterimiz sheteldiń filmderin kórip, ózge eldiń kontentin tutynady. Al biz óz elimizdegi balalardy tolǵandyratyn máselelerdi kóterip, óz bolmysymyzdy ashyp kórsetkimiz keldi», -deidi Elaman Shalbaev.
Foto: ult.kz
«Selfi s predkami» filmin 6 jastan bastap kórýge usynylady eken. Kinoǵa stsenariidi 7 adam birigip jazǵan. «Stsenarii jazý barysynda balalarmen de aqyldastyq» dep otyr filmniń qoiýshy rejisseri.
Filmde qoǵamdy alańdatatyn ózekti máselelerdiń biri balalar arasyndaǵy álimjettik problemasy kóteriledi.
«Kinoda ata-ana men balanyń arasyndaǵy qarym qatynasty barynsha ashyp jetkizýge tyrystyq. Býllingtiń túpki sebebi ata-ana men balanyń arasyndaǵy qarym qatynasta jatady deidi mamandar. Álimjettik jasaýshy da, onyń qurbany da ishki jaraqaty bar bala bolýy múmkin. Negizi ár balanyń júreginde jylý bar, tek ony jaǵa alý kerek, kóre alý qajet», -deidi Elaman Shalbaev.
Elaman Shalbaev balalarmen jumys isteý unaǵanyn aitty.
«Biz akterlardy irikteý kezinde balalardyń qabiletine ǵana emes, shydamdylyǵyna da mán berdik. Sebebi tolyqmetrajdy film túsirý uzaq ýaqytty alatyn jumys. Túsirilim barysynda bala shydamasa prodakshnǵa da úlken másele týdyrýy múmkin. Sondyqtan barlyǵyn aldyn ala oilastyryp alǵandyqtan eshqandai qiyndyq týyndaǵan joq», -dedi ol.
Filmniń qoiýshy rejisseri mundai otbasylyq kinolarǵa suranys kóp ekenin aityp, filmniń jalǵasyn da túsirýge niet etip otyrǵandaryn aitty.
Qazirgi kezde synnyń astynda qalyp jatqan filmder de barshylyq ekenin jáne «Selfi s predkami» kinosy da kórermenderdiń synyna qalsa ne istemek ekenin suraǵanymyzda:
«Árine ol damýǵa demeý ǵoi. Eger bireý myna jeriń durys emes dese, óz tarapyńnan ony zerttep, «shynymen durys emes eken» dep kóz jetkizýge bolady. Biz bir ornynda turǵan joqpyz, árqashan damýǵa tyrysamyz. Sondyqtan erteń syn kelip jatsa da ony qýana-qýana qabyldaimyz», -deidi Elaman Shalbaev.
Al qazirgi kezde jańbyrdan keiingi sańyraýqulaqsha kóbeiip ketken otandyq filmderdiń sapasyna qatysty Elaman Shalbaev qandai oida ekenin surap, bildik.
«Bizdiń táýelsiz elimizdiń kinematografiiasynyń damyp jatqany endi ǵana. Bizde kino salasynyń mamandaryn oqytyp jatqan ýniversitetter de kóp emes jáne indýstriia da úlken emes. Bizde Qazaqstan halqy 50 - 100 mln. bolyp jatsa ol basqa áńgime bolýshy edi. Al biz ainaldyrǵan 20 mln-ń ar jaq, ber jaǵyndamyz, sondyqtan damý qiyn negizi. Otandyq filmderdiń sany kóp, sapasy az ekeni ras. Biraq degenmen, bul da damýdyń belgisi. Ýaqyt óte san – sapaǵa ákeledi», -deidi Elaman Shalbaev.
Baljan Jeńisqyzy
