Tótenshe jaǵdailar ministrliginiń aviaparki jańa tikushaqpen tolyqty, dep habarlaidy "Ult aqparat" IIDM baspasóz qyzmetine silteme jasap.
Tikushaqtyń qurylǵylary frantsýzdyq «Airbus Helicopters» zaýytynda jasalǵan. Al qurastyrý jumystary QR IIDM «Qazaqstan injiniring» UK» AQ men «Airbus Helicopters» birlesken jobasy – «Eurocopter Kazakhastan Engineering» JShS zaýytynda oryndalǵan. Bul - TMD aýmaǵyndaǵy atalǵan tikushaq túrlerin qurastyrý men tehnikalyq qoldaý kórsetetin jalǵyz óndiris orny.
"H-145 – qos qozǵaltqyshty Airbus tikushaqtary túrine jatady. Jolaýshy syiymdylyǵy – 9 adamǵa deiin jáne oryn konfigýratsiiasyn jyldam ózgertý múmkindigi bar. Álem boiynsha 1500-den astam atalǵan tikushaq túrleri paidalanýǵa berilgen jáne jalpy ushý ýaqyty 6 million saǵattan astam ýaqytty quraidy. Áýe kóliginiń sapasy álemdik jetekshi óndirýshi kompaniialardyń talaptary men Eýropalyq áýe navigatsiiasynyń qaýipsizdik uiymynyń (EASA) ushý jaramdylyq normalaryna tolyǵymen sáikes keledi.
Tikushaq qalaqshasyndaǵy 5 buranda arnaiy topsalar men sharikti ishpektersiz qurastyrylǵandyqtan H-145-te ushý kezindegi diril aitarlyqtai tómendegen. Bul óz kezeginde jolaýshylardyń jailylyq deńgeiin arttyryp qana qoimai, dirildi báseńdetý júiesinen tolyǵymen bas tartýǵa múmkindik berdi. Nátijesinde paidaly júk kólemi 150 kelige deiin artty. Qazirgi kúnde H-145 óz klasy boiynsha eń joǵary júk tasymaldaityn tikushaq bolyp tabylady. Áýe kóligi 2019 jylǵy qyrkúiekte biiktigi 6 961 metrdi quraityn And taýynyń eń biik shyńy Akonkagýaǵa qondy" - delingen habarlamada.
Tikushaqty izdestirý-qutqarý sharalaryna, turǵyndarǵa jedel meditsinalyq kómek kórsetý, sanitarlyq is-sharalardy júrgizý jumystarynda, sondai-aq orman qoryn kúzetý jáne qorǵaýǵa paidalaný josparlanyp otyr.
Jańa tikushaqty tiimdi basqarýdy meńgerý úshin TJM aviatsiialyq qurylymy – «Kazaviaspas» AQ-nyń ushý jáne tehnikalyq quramy Germaniiada teoriialyq jáne praktikalyq biliktiligin jetildirgen.
Jalpy aitqanda, otandyq áýe kemelerin keńinen paidalaný – elimizdiń qorǵanys-ónerkásiptik keshenin damytýdyń basty faktory bolyp tabylady.
Búginde TJM aviparkin negizinen otandyq jáne sheteldik áýe kemeleri quraidy. Olardyń qatarynda Airbus EC-145,H-145, H-130 tikushaqtar toby, Mi-8 túrleri men Mi-26T jáne Ka-32 bar.
