Tórt kún buryn jarylys bolǵan Arys qalasyndaǵy úilerdiń 85 paiyzynyń terezesi shaǵylǵan, esigi synyp, shatyry zaqymdanǵan. Bul týraly búgin, 28 maýsymda Túrkistan oblysy tótenshe jaǵdai departamentiniń bastyǵy Nurǵali Júnisov habarlady. Onyń sózinshe, 24 maýsymda 63 órt jaǵdaiy tirkelip, 26 úi órtengen.
28 maýsymda Arys qalasy ashyldy. Juma kúni tańǵy 6.00-den bastap Shymkenttegi qyryqtan asa evakýatsiialyq pýnkten arystyqtardy avtobýs úilerine jetkizdi.
Túrkistan oblysynyń ákimdigi búgin, 28 maýsymda ekologiia ministri Maǵzum Myrzaǵalievtiń "qalada radiatsiia joq" degen málimdemesin taratty.
"Aýa taza, sý men jer lastanbaǵan. Ekologiia, geologiia jáne tabiǵi resýrstar ministri Arys qalasynyń ekologiiasy qaýipsiz ekenine kepildik beredi" deidi ministr Myrzaǵaliev.
Túrkistan oblysy ákiminiń keńesshisi Sáken Qalqamanov óziniń Facebook paraqshasynda arystyqtar otyrǵan avtobýstar men snariadtar qulap zaqymdanǵan úilerdiń videosyn jariialady.
Keshe, 27 maýsymda júzdegen arystyq kóshege shyǵyp, "úiimizge qaitýdan qorqamyz, basqa jerden baspana ne jer berińder" degen. Narazylyq kúsheigen tusta Túrkistan oblysynyń ákimi Ómirzaq Shókeev jarylys bolǵan qalanyń 28 maýsym kúni tańǵy 8.00-de ashylatynyn habarlaǵan.
Eske sala keteiik, 24 maýsym kúni tańerteń Arystaǵy áskeri oq-dári qoimasynda aldymen órt shyǵyp, keiin jarylystar bolǵan. Densaýlyq saqtaý ministrliginiń dereginshe, jarylystan úsh adam mert bolyp, 160-tan astam adam zardap shekken.
