Astana turǵyny Jandos Qurmanbaev balkonǵa týdy qalai ilý kerektigi týraly laifhak túsirdi. Bir qyzyǵy, 2015 jyly oǵan balkonǵa Memlekettik týdy ilgeni úshin 400 myń teńgege jýyq aiyppul salynǵan, - dep habarlaidy Tengrinews.kz tilshisi.
Jandos Qurmanbaev aldymen 2015 jylǵy oqiǵany áńgimelep bergen.
"2015 jyly politsiia jáne ákimdik qyzmetkerleri balkonǵa tý ilgenim úshin qaýmalap aldy. Páterimde formadaǵy beitanys adamdar "Memlekettik Týdy paidalaný erejelerin buzý" boiynsha hattamany toltyryp, jaýap alǵan kezde qorlanǵan jaǵdaiym esimde. Ketip bara jatyp, olar Týdy qylmys quraly retinde tárkiledi. Sol kúni óz elimde ózimdi jat sezindim. Biraq qoǵamdyq qoldaý men rezonans arqasynda búginde Týdy ilip qoiýǵa bolady jáne qajet", - dep eske alady astanalyq.
Kóp jyl ótken soń Qurmanbaev burynǵy áreketin qaitalap qana qoimai, barlyq patriot úshin laifhak túsirgen. Qazaqstan azamaty videosynda úiiniń balkonyna Týdy qalai uqypty ilý kerektigin egjei-tegjeili kórsetedi. Astana turǵyny eshqandai zań buzbaǵandyqtan, óz áreketi zańmen jazalanbaitynyna senimdi.
"Men birneshe nárseni ustanamyn. 2022 jyldyń maýsymynda Prezident Toqaev "Týdy týǵan jerińde biikke kóter" degen qanatty sózdi keltirdi jáne memlekettik rámizderdi paidalaný erejelerin túzetý maqsatynda zańnamaǵa túzetýler engizýdi usyndy, osylaisha qazir bul patriottyq áreketti kórsetýdiń tyiym salynǵan túrine jatpaidy. Al ekinshiden, balkonǵa Tý ilýge tyiym salatyn zań joq. Týǵa uqypty, qurmetpen qaraýdy retteitin zań bar. Bul jerde Týdyń jerge, sýǵa timeýi, las bolmaýy, onymen birdeńeni oraýǵa bolmaidy, Týdy jyrtyp, tóńkerip ustaýǵa bolmaidy, tek adam apat signalyn habarlaǵan jaǵdaidan basqa. Osyndai taǵy da basqa. Sondyqtan esh jerde Týdy balkonǵa ilýge bolmaidy dep aitylmaǵan. Sondyqtan osynyń barlyǵyn ustanamyn", – deidi Jandos Qurmanbaev.
Ol bolashaqta, ásirese, Respýblika kúni men Táýelsizdik kúninde Memlekettik Týdy jelbiretý naǵyz dástúrge ainalatynyna senimdi.
Eske salaiyq, 2015 jyldyń 28 aqpanynda Jandos Qurmanbaev úiiniń balkonyna Qazaqstan Respýblikasynyń Memlekettik Týyn ilip qoiǵany úshin 396 400 teńge aiyppul arqalaǵan. Óz kezeginde zańger Mihail Klenchin Astana turǵynyna zańsyz aiyppul salynǵanyn málimdegen edi.
