Qazaqstan Jazýshylar Odaǵynyń múshesi, kórnekti aqyn Tynyshtyqbek Ábdikákimulynyń "Besinshi maýsym jupary" atty jańa kitaby jaryq kórdi.
Belgili qalamgerdiń jańa jinaǵyna óleńderi men tolǵaýlary, balladalary men poemalary engen.
Jańa kitap - Tabiǵat-Ananyń tylsym kúshteriniń, qoǵamdyq qubylystardyń hám tarih taǵylymdarynyń alýan syr-sipattary men adam jan dúniesiniń de qupiialaryn tanyp-bilýge yntyq oqyrmandardy parasatty oi, sulý sezim qýatymen baýrap alarlyq poetikalyq-filosofiialyq tosyn sheshimderimen qundy.
Kitap "Atamura" baspasynan 500 danamen jaryq kórgen.
Tynyshtyqbek Ábdikákimuly - ótken ǵasyrdyń sońǵy shireginde qazaq poeziiasyna erekshe únimen, ózindik boiaýyn ala kelgen sanaýly talanttardyń biri. Aýylda, jailaýda júrip úlken ádebiet maidanyna ún qosqan aqyn. Onyń ómir qubylystary, jaratylys qupiialary, adam boiyndaǵy tylsym syrlar, ulttyń ótkeni men keleshegi týraly oqys oilary oqyrman arasynda qyzý pikirtalasqa túsip jatady. Aqyn óz týyndylarynda tabiǵat qubylystarynyń astaryn ashyp, ainala dúniemen salystyra otyryp, ári aiqyn, ári obrazdy túrde jyrlai biledi. Tirshiliktiń ár qubylysyna aqyndyq asqaq sezimmen qaraidy. Ainaladaǵy qubylysqa jai ǵana tebirenip qoimaidy, sol qubylysty ómirmen, adamnyń jan-dúniesimen ushtastyrady. Oidy, sezimdi jalańashtamai, poeziiaǵa tán aqyndyq tilmen obrazdy túrde beinelep otyrady.
Aita ketsek, buǵan deiin aqynnyń "Aqsham hattar" (1990), "Yraýan" (2000) atty jyr jinaqtary jaryq kórgen bolatyn. Sondai-aq, 2001 jyly "Elorda" baspasynan "Qas Saq Ańqymasy" atty filosofiialyq eńbegi shyqqan.
Ult portaly ujymy Tynyshtyqbek Ábdikákimulyn quttyqtai otyryp, shyǵarmashylyq tabystar tileidi! Qazaq ádebieti qoryna qosylǵan jańa týyndynyń shyǵarmashylyq ǵumyry uzaq bolsyn!
