QR Premer-Ministri Álihan Smaiylov Májilis ókilderiniń depýtattyq saýalyna joldaǵan jaýabynda diqandar úshin tyńaitqysh baǵasyn arzandatýǵa respýblikalyq biýjetten qosymsha qarjy bólý máselesi qarastyrylyp jatqanyn málim etti, dep habarlaidy QazAqparat.
«Mineraldy tyńaitqyshtardy sýbsidiialaýdy sheshý boiynsha 2021 jyly mineraldy tyńaitqyshtardyń álemdik baǵasy tabiǵi gaz ben elektr qýatynyń qymbattaýyna bailanysty aitarlyqtai ósti. Qalyptasqan jaǵdaidy eskere otyryp, aýyl sharýashylyǵy taýaryn óndirýshilerdi qarjylyq qoldaý maqsatynda tyńaitqyshtardy sýbsidiialaý normalary aǵymdaǵy naryqtyq baǵany eskere otyryp, qaita qaraldy. Búgingi tańda oblys ákimdikteri normalardy qaýlymen bekitý rásimin qolǵa alǵan», - dep jazylǵan jaýapta.
Aitýynsha, qazir Aýyl sharýashylyǵy ministrligi Indýstriia jáne infraqurylymdyq damý ministrligimen jáne oblys ákimdikterimen birlese otyryp, mineraldy tyńaitqyshtardyń baǵasyn tómendetý jumysyn júrgizip jatyr.
«Aitalyq, otandyq taýar óndirýshilermen birqatar kezdesýler men keńester ótkizilip, nátijesinde aýyl sharýashylyǵy taýaryn óndirýshilerdi qoljetimdi baǵadaǵy mineraldy tyńaitqyshtarmen qamtamasyz etý týraly kelisimge qol jetkizildi. Aýyl sharýashylyǵy taýaryn óndirýshilerdiń málimdelgen kólemi naqty jetkizý kestelerin qalyptastyrý úshin otandyq zaýyttarǵa jiberildi. Sondai-aq, «QazAzot» AQ-men ótkizilgen keńestiń qorytyndysy boiynsha ammiak selitrasynyń baǵasyn jyl basyndaǵy belgilengen baǵadan 25 %-ǵa (tonnasyna 200,0 myń teńgeden 160,0 myń teńgege deiin) tómendetý jóninde kelisimge qol jetkizildi. Óńirlerdiń arzandatylǵan tyńaitqyshqa qajettiligin qamtamasyz etý úshin jergilikti biýdjette 26,8 mlrd teńge kózdelgen. Sonymen qatar, qazirgi ýaqytta respýblikalyq biýdjetten qosymsha qarajat bólý máselesi qarastyrylýda», - dedi Álihan Smaiylov.
Tiisti biýdjettik ótinim qaralyp, respýblikalyq biýdjet komissiiasynyń qaraýyna Qarjy ministrligine engizilgen.
«Jalpy, kóktemgi dala jumystarynyń bastalýymen óńirlerdiń mineraldy tyńaitqyshtarmen qamtamasyz etilýine monitoring júrgizilýde. 25 naýryzdaǵy jaǵdai boiynsha 265,4 myń tonna tyńaitqysh jetkizýge kelisimshart jasalyp, onyń 116,4 myń tonnasy tielip-jóneltildi. Tyńaitqysh satýshylar qoimalardy toltyrýda, tyńaitqysh jetkizý uiymdastyrylǵan. Kei óńirlerde oblys ákimdikteri otandyq zaýyttarmen memorandýmǵa qol qoiyp, jetkizilim kólemin bekitti», - delingen Premer-Ministrdiń jaýabynda.
