Qaraǵandy oblysy, Buqar jyraý aýdany Kókpekti aýylynda sý aidynynda qaiǵyly oqiǵa boldy. 15 jastaǵy kámeletke tolmaǵan qyz bala sýǵa batyp kóz jumdy, dep habarlaidy ult.kz.
Aldyn ala málimet boiynsha, bir top jasóspirim eresekterdiń qaraýynsyz ózen jaǵasynda bolyp, tyiym salynǵanyna qaramastan sýǵa túsken. Osy sátte qaiǵyly jaǵdai oryn alǵan.
Oqiǵa ornyna jetken qutqarýshylar shamamen 4 metr tereńdikten, jaǵadan 20 metr qashyqtyqta qyz balanyń denesin tapqan.
Aita keteiik, bul aýmaqta shomylýǵa tyiym salatyn belgi 2 maýsym kúni ornatylǵan. Sonymen qatar jazǵy demalys aldynda mektepterde oqýshylarǵa sýdaǵy qaýipsizdik erejeleri boiynsha túsindirý jumystary júrgizilgen.
Mamandar sýdaǵy qaýipsizdik talaptaryn qatań saqtaýdyń mańyzyn eskertedi: tyiym salynǵan jerlerde shomylmaý, balalardy qaraýsyz qaldyrmaý jáne eskertý belgilerine nazar aýdarý qajet.
Mundai oqiǵalardyń basym bóligi dál osy erejelerdiń saqtalmaýynan bolatyny jii aitylady.
Sondai-aq, Aqmola oblysynda da bir kún ishinde sý aidyndarynda balalarǵa qatysty eki oqiǵa tirkelip, sonyń birinde kámeletke tolmaǵan bala qaza tapqan edi.
