Twitter áleýmettik jelisi AQSh prezidenti Donald Tramptyń akkaýntyn birjolata bloktap tastady, dep habarlaidy "Ult aqparat" Amerika daýysy aqparat agenttigine silteme jasap.
Twitter kompaniiasy osyǵan bailanysty málimdeme jasady.
«@realDonaldTrump akkaýntynda jariialanǵan sońǵy tvitterdi jáne onyń mazmunyn, ásirese Twitter qaýymynda qalai qabyldanyp, ári qarai qandai kontekste taraǵanyn egjei-tegjeili tekserip shyqqan soń osyndai sheshim qabyldadyq. Biz zorlyq-zombylyqqa aparyp soǵý qaýpin eskere otyryp, akkaýntty birjola óshirdik. Osy aptadaǵy sumdyq oqiǵalardan keiin biz Twitter qoldaný talaptaryn qaitadan buzý dál osyndai jaǵdailarǵa ákeletinin habarlaǵan bolatynbyz. Bizdiń talaptar tańdaýly resmi tulǵalar men álemdik kóshbasshylardan tikelei aqparat alýǵa múmkindik beredi. Alaida biz áý bastan bul akkaýnttar bizdiń erejege baǵynýǵa tiis ekenin jáne olar Twitter-di zorlyq-zombylyq týǵyzý úshin paidalana almaitynyn anyqtap túsindirgen edik» delingen kompaniia habarlamasynda.
Twitter sonymen qatar Donald Tramptyń sońǵy tvitteri men olardyń kei qoldanýshylarǵa qalai áser etkenine jasalǵan analizdiń qorytyndysyn jariialady. Kompaniia bul tvitter jańadan zorlyq-zombylyq jasaýǵa sebep bolýy múmkin dep otyr.
Prezident kezinde Donald Tramp 26 myńnan astam tvit jariialaǵan. Kúnine orta eseppen 18 tvit jazyp otyrǵan.
Twitter sheshimi jaily Donald Tramp bylai dedi:
«Bizdiń aýzymyzdy eshkim jaba almaidy. Jaqyn arada onyń ornyn basatyn jańa platforma jasaýdy qarastyryp jatyrmyn».
Ol bul sózderdi óziniń resmi Twitter akkaýntynda jazdy, alaida kompaniia ony birden óshirip tastady.
Demokrattar men kei respýblikashyldar Trampty 6 qańtar kúni jaqtastaryn zorlyq-zombylyqqa arandatty dep aiyptaidy. Sol kúni AQSh prezidentiniń ashýly jaqtastary eldiń jańa sailanǵan prezidenti Djo Baidenniń sailaýdaǵy jeńisin bekitýi kerek bolǵan Kongress jiynyn buzý úshin Kapitolii ǵimaratyna basyp kirgen. Oqiǵa kezinde Twitter Tramptyń akkaýntyn 12 saǵatqa buǵattaǵan.
Tramptyń ózi Vashingtondaǵy oqiǵany synǵa aldy, biraq tvitteriniń birinde jaqtastaryna "ádiletsizdik" jasalýyna jol bermeitinin aitty.
Tramptyń AQSh prezidenti retindegi resmi Twitter-akkaýnty jumysyn jalǵastyra beredi, biraq onda tvitter sirek, júieli emes túrde shyǵyp otyrady.
Aq úi men Donald Tramptyń ózi kompaniianyń bul sheshimi jóninde pikir bildirmedi. Munyń aldynda Tramptyń akkaýntyn Facebook te buǵattaǵan.
