Búgin Halyqaralyq Túrki akademiiasynyń (HTA) uiymdastyrýymen jáne Iýnýs Emre atyndaǵy túrik mádeni ortalyǵynyń qoldaýymen Túrkiianyń Respýblika kúnine orai «Bairaǵy biik baitaq el» atty shara ótti, dep habarlaidy "Ult aqparat".
Alqaly jiynǵa Halyqaralyq Túrki akademiiasynyń prezidenti Darhan Qydyráli, Túrkiia Respýblikasynyń Qazaqstandaǵy Tótenshe jáne Ókiletti Elshisi Ýfýk Ekiji, Qazaqstan halqy Assambleiasy Tóraǵasynyń orynbasary - QR Prezidenti Ákimshiligi QHA Hatshylyǵynyń meńgerýshisi Janseiit Túimebaev, QR Syrtqy ister ministrligi Taiaý, Orta Shyǵys jáne Afrika departamentiniń direktory Erjan Muqash, Túrki keńesi Aqsaqaldar keńesiniń múshesi, memleket jáne qoǵam qairatkeri Ádil Ahmetov, diplomatiialyq missiia ókilderi, memleket jáne qoǵam qairatkerleri, ǵalymdar, ziialy qaýym ókilderi men BAQ jetekshileri, sonymen qatar Iýnýs Emre atyndaǵy túrik mádeni ortalyǵynyń tálimgerleri qatysty.
Basqosý barysynda HTA ázirlegen Atatúrik týraly derekti film kórsetildi. Sonymen qatar, Túrkiia Elshisi Ýfýk Ekiji sóz sóilep, uiymdastyrýshylarǵa alǵysyn bildirdi. Budan keiin Iýnýs Emre atyndaǵy túrik mádeni ortalyǵynyń tálimgerleri Muhammediiar Ankabaev pen Baqdaýlet Tashmanov kelgen qonaqtarǵa arnaiy túrik tilinde óleń oqydy. Oqýshylarǵa sharaǵa belsendi atsalysqany úshin HTA-nyń arnai sertifikattary tabystaldy.
Sondai-aq, Túrkiia respýblikasynyń negizin qalaýshy Mustafa Atatúrik týraly kitap kórmesi uiymdastyryldy.
Aita ketý kerek, osydan bir ǵasyrǵa jýyq ýaqyt buryn Anadolyda ult kóshbasshysy Kemal Atatúrik bastaǵan shet el interventteriniń jaýlaýynan azat etýge baǵyttalǵan ult-azattyq kúres jeńispen aiaqtaldy. Osylaisha, 1923 jyly 29 qazan kúni Túrkiianyń tuńǵysh prezidenti Mustafa Túrkiia Respýblikasyn jariialady. Dástúr boiynsha merekelik sharalar eldiń bas qalasy Ankaradaǵy Atatúrik kesenesinde bastalady. Bul jerdegi sharanyń alǵashqy legi memleket jáne qoǵam qairatkerleriniń qatysýymen ótip, Ult azattyq kúrestiń barlyq qaharmandaryn qurmetpen eske alady.
