Ońtústik Qazaqstan oblysynda jer qoinaýyn zańsyz paidalanýǵa jol berilmeýi kerek. Bul týraly selektorlyq májiliste oblys ákimi Janseiit Túimebaev málim etti, dep habarlaidy "Ult aqparat" aimaq basshysynyń baspasóz qyzmetine silteme jasap.
Jiynda «Jer qoinaýyn zańsyz paidalanýdy toqtatý jáne kelisim shart boiynsha júrgizilip jatqan jumystardyń barysy týraly» oblystyq tabiǵi resýrstar jáne tabiǵat paidalanýdy retteý basqarmasynyń basshysy Ilias Quramysov baiandama jasady. Basqarma basshysynyń aitýynsha, sońǵy jyldary Sairam aýdany arqyly ótetin «Aq sý», «Sairam sý» ózenderiniń jaǵalaýlarynda zańsyz jer qoinaýyn paidalaný faktileri jii tirkelip otyr.
«Birinshi kezekte Sairam aýdany Aqsý ózeni boiyndaǵy 12 kásiporynǵa tekserý taǵaiyndalyp, jer ýchaskeleriniń nysanaly maqsatqa sai paidalanbaǵany anyqtaldy. Odan bólek, turaqty túrde reidtik sharalar uiymdastyrý kezinde biyl 15 derek faktini anyqtadyq. Jalpy, ishki ister organdarynda aǵymdaǵy jyly jer qoinaýyn zańsyz óndirý boiynsha 80 derek tirkeldi. Onyń ishinde 41- is óndiristen qysqartylsa, 4 - is óndiriste, 32 - is ákimshilik shara kórý úshin oblystyq ekologiia departamentine joldanǵan. Ekologiia departamenti tarapynan 20 zańdy jáne jeke tulǵaǵa - 2,7 mln teńge aiyppul salyndy. Onyń óndirilgeni 1,93 mln teńgeni quraidy», - dedi Ilias Quramysov.
2017 jyldyń sáýir aiynan bastap Sairam aýdanynda 12 nysan tekserilip, zań buzýshylyqtardy joiý jóninde berilgen nusqamalardyń 3 ailyq merzimi ótkenimen, búgingi kúnge kásiporyndarǵa naqty sharalar qabyldanbaǵan. Bir qyzyǵy, búginge deiin oblys boiynsha birde - bir zańsyz jer qoinaýyn paidalanýshy qylmystyq jaýapkershilikke tartylmapty. Sebebi, keltirilgen zardap 1 000 ailyq eseptik kórsetkishten aspasa, ákimshilik jaýapkershilik sheginde qarastyrylady.
«Oblysta 166 zańdy jer qoinaýyn paidalanýshylarǵa kelisimshart berilgen bolatyn. Solardyń tek 65-ǵana jer ýchaskeleri karer retinde rásimdelgen, al qalǵan 101 jer ýchaskesi aýyl sharýashylyǵy maqsatyndaǵy jerler esebinde tur. Jer qoinaýyn paidalanýshylar tarapynan jer ýchaskesin paidalaný zańdylyǵyn jáne jer ýchaskeleriniń quqyq berý qujattarynyń zańdylyǵyna basty nazar aýdaryp, tekserý jumystary júrgizilsin», - dedi Janseiit Qanseiituly.
Óńir basshysy jer qoinaýyn zańsyz paidalaný faktilerin aldyn-alý nemese joiý jumystaryn báseńdetkeni úshin salaǵa jaýapty qyzmetkerlerge qatań tártiptik shara qoldanýdy tapsyrdy. Osy rette aýyl okrýgteriniń ákimderi men ýchaskelik politsiianyń qyzmetine sáikestigi tekseriletin boldy.
