Ońtústik Qazaqstan oblysynyń ákimdiginde óńir basshysy J. Túimebaevtyń tóralyǵymen keńeitilgen májilis ótti. Kún tártibinde 3 másele qaralyp, biylǵy jylǵa qoiylǵan maqsat-mindetter sarapqa salyndy.
Oblysymyzdaǵy memlekettik qyzmet kórsetý sapasyn arttyrý boiynsha oblys ákimi aparaty basshysynyń orynbasary Gúlnur Asylbekova baiandama jasady. Onyń aitýynsha, qazirgi tańda oblystyq jergilikti atqarýshy organdar tarapynan 194 qyzmet túri kórsetiledi. 2016 jyldyń qorytyndysy boiynsha halyqqa jalpy sany 20 181 504 memlekettik qyzmet kórsetilse, biylǵy jyldyń 1 jarty jyldyǵynda bul kórsetkish 9 211 756–ǵa jetken.
«Aǵymdaǵy jyldyń 6 aiynyń qorytyndysy boiynsha 1 509 070 qyzmet elektrondy túrde kórsetildi. Bul jalpy kórsetilgen qyzmetterdiń 16 paiyzyn quraidy. Osy turǵyda 7,6 mln. qyzmetti elektrondy túrde nemese HQKO arqyly kórsetý múmkindigi bolǵanyn atap ótý qajet. Kórsetilgen qyzmetterdiń 80 paiyzy densaýlyq saqtaý salasyna tiesili», - deidi Gúlnur Asylbekova.
Sońǵy 7 aidyń qorytyndysy boiynsha HQKO arqyly 361 532 elektrondy qoltańba berilgen. Alaida elektrondy qyzmetterdiń úlesi áli de tómen. Sebebi, qyzmet usynýshy memlekettik organdar tarapynan elektrondy qyzmetterdi alý joldary turǵyndarǵa óz deńgeiinde nasihattalmai otyr.
Atalǵan máselelerdiń mán-jaiyna qanyqqan oblys ákimi qujattardyń merzimderin buzýǵa jol bergizgen aýdan, qala ákimderi men oblystyq basqarma basshylaryna qatań túrde jaza qoldanylatynyn eskertti.
«Memlekettik qyzmet kórsetý sapasyn arttyrý — memlekettik saiasattyń basym baǵyttarynyń biri. Sondyqtan bul mindetke salǵyrttyq tanytýǵa bolmaidy. Osy rette aýdan, qala ákimderi, oblystyq basqarma basshylary elektrondy qyzmetterdiń úlesin arttyrý boiynsha halyqqa qyzmet kórsetý ortalyqtarymen tyǵyz jumys jasaýy qajet», - dedi Janseiit Qanseiituly.
Kún tártibindegi ekinshi másele – oblysqa investitsiia tartý boiynsha 7 aiddaǵy atqarylǵan jumystardy saralaý. 2017 jyldyń 7 aiynda negizgi kapitalǵa tartylǵan investitsiia kólemi 229,9 mlrd. teńgeni quraǵan. Bul kórsetkish 2016 jyldyń tiisti kezeńimen salystyrǵanda 131,5 paiyzǵa ósip otyr. Al syrtqy investitsiialardyń kólemi 42,2 mlrd teńgeni qurady.
Sondai-aq, májiliste mindetti áleýmettik meditsinalyq saqtandyrý júiesiniń iske asý barysy talqylandy. Aqparattyq-túsindirý jumystarynyń nátijesinde oblysymyzda barlyǵy 2 mln. 130 myńǵa jýyq halyqqa túsindirý jumystary júrgizilipti. Barlyq aýdan, qalalarda mártebesi belgisiz azamattardy túgendeý jumystary júrgizilip, qazirgi kezde atalǵan azamattardy ózektendirý jumystary qorytyndylanyp jatyr.
