Ońtústik Qazaqstan oblysy Báidibek aýdanynyń potentsialy áli de bolsa tolyq paidalanylmai keledi. Bul rette jalpy aýmaǵy 60 gektardy quraityn «Shaian» indýstrialdy aimaǵynyń tiimdiligin arttyryp, negizgi óndiris oshaqtaryn osynda shoǵyrlandyrý qajet. Sondai-aq jergilikti kásipkerlerdiń qulshynysyn arttyratyn tyń ári ilkimdi jobalardyń ázirlenýine mán bergen jón. Bul týraly Báidibek aýdanyna is-saparmen baryp, atqarylǵan jumystardyń barysymen tanysqan Ońtústik Qazaqstan oblysynyń ákimi Janseiit Túimebaev málim etti. Bul týraly OQO ákiminiń baspasóz qyzmeti habarlady.
Óńir basshysy aldymen Boraldai aýyldyq okýrigine qarasty Talap eldimekenindegi «Taý Alma Baq» JShS-niń jumysymen tanys boldy. Atalǵan kásiporyn quryltaishylar esebinen jalpy quny 2 million AQSh dollaryn quraityn 43 gektarǵa qarqyndy baý otyrǵyzypty. 2013 jyly qolǵa alynǵan jobanyń maqsaty – baý kólemin 83 gektarǵa jetkizý. 107 gektar jerdi tolyq qorshap, tirligin dóńgeletip otyrǵan mekeme aldaǵy ýaqytta ár gektardan 50 tonnaǵa deiin ónim alýdy josparlap otyr. Seriktestik basshysy Seitjappar Ábdýsadyquly oblys ákimine almadan bólek jańǵaq egý isin de qolǵa alyp otyrǵanyn jetkizdi.
«Boraidai aýyl okrýginiń taýly aýmaǵy alma egýge óte qolaily. Sondyqtan baýdyń kólemin jyl sanap arttyryp, jańǵaq egýdi de qolǵa alǵanyńyzdy quptaimyn. Aldaǵy ýaqytta ózge okýrgterden de baý egýdi qolaǵa alsańyz, aýdan ákimdigi tarapynan barlyq qoldaýlar kórsetiletin bolady», - dedi Janseiit Qanseiituly.
Báidibek aýdany maqsarysymen aty shyqqan óńir. Búginde bul daqylǵa shetelden de suranys kóp. Byltyr aýdanda 23 myń gektarǵa maqsary egilse, onyń kólemi biyl 43 myń gektarǵa jetken. Sharýalar búginde gektaryna 7-8 tsentnerden ónim alyp, oblysymyzdaǵy mai óndirýshi kásiporyndardy shikizatpen qamtamasyz etip otyr. Jol boiy oraq naýqanyn qyzdyryp jatqan sharýalardyń jumysymen tanysqan óńir basshysy aldaǵy jyldary aýdannan maqsary maiyn óndiretin kásiporyn ashýǵa keńes berdi.
Munan soń oblys ákimi Boraldai aýyl okrýgindegi «Aberdin–Angýs» tuqymdy iri qara mal sharýashylyǵyna baryp, jeke kásipker Maqsat Nazarbaevtyń jumys júiesimen tanys boldy. 2015 jyly qurylǵan sharýashylyq qorasynda búginde 154 asyl tuqymdy mal basy bar. 3500 gektar jeri bar qojalyq aldaǵy ýaqytta mal basyn 2 myńǵa jetkizýdi josparlaýda.
Oblys ákimi «Shaian» indýstrialdy aimaǵyna da atbasyn buryp, ondaǵy iske asqaly otyrǵan jobalardyń barysymen tanysty. Jalpy aýmaǵy 60 gektardy quraityn aimaq búginde barlyq infraqurylymdyq qajettiliktermen qamtylǵan. Endigi másele - investorlar tartyp, jańa jumys oryndaryn kóptep ashatyn kásiporyndardy shoǵyrlandyrý.
«Indýstrialdy aimaqtyń múmkindigin tiimdi paidalana almai otyrsyzdar. Áli kúnge munda kásiporyn qurý jumystary qolǵa alynbai keledi. Osy rette aýdan ákiminiń jumysyna syn aitýǵa bolady. Jyl sońyna deiin naqty iske asyrylatyn jobalardy talqylap, aldaǵy jyly kásiporyndardy tezdetip ashýdy tapsyramyn», - dedi oblys ákimi.
Munan soń óńir basshysy Aqbastaý aýyldyq okrýgindegi «Domalaq ana» kesenesi aýmaǵyndaǵy jibek óndiretin qojalyqtyń jumysymen tanysty. Jibek óndirýdi qolǵa alǵan kásiporyn búginniń ózinde sol mańǵa 140 myń túp tut otyrǵyzypty. Biyl qojalyq Shaian aýylynan «ON –Báidibek» qolóner ortalyǵyn ashyp, jibekten kilem toqý, kiizden shulyq basý, qazaqy oiý-órnektpen shapan tigý isin de jandandyryp otyr eken.
Budan bólek, aýdanda Arab investory Sheih Halifanyń qus ósirý ortalyǵy kún sanap damyp keledi. 895 gektar jerdi alyp otyrǵan kásiporyn 3,5 mlrd teńge shetel investitsiiasyn tartyp, dýadaq qusy túriniń basyn 4 myńǵa jetkizgen. Jylyna biýdjetke 700 mln teńge salyq tóleitin investorlar jobanyń úshinshi kezeńin iske asyryp, jumysshylar sanyn 400-ge arttyrýdy josparlaýda. Sondai-aq sheteldik kásiporyn aýdandaǵy 5 áleýmettik nysannyń qurylysyn óz qarajatyna júrgizýge niet etip otyr. Atalǵan kásiporynǵa arnaiy barǵan oblys ákimi mundaǵy arqarylǵan jumystarǵa da oń baǵasyn berdi.
