Qazaqstanda tutynýshylardyń shaǵymyn qabyldaýdyń Biryńǵai aqparattyq júiesi qurylady. Bul týraly QR Parlamenti Senatynyń jalpy otyrysynda tutynýshylardyń quqyqtaryn qorǵaý máseleleri kózdelgen zań jobasyn tanystyrǵan QR Saýda jáne integratsiia ministri Baqyt Sultanov aitty, dep habarlaidy QazAqparat.
«Ýákiletti organnyń rólin kúsheitýde birinshi kezekte tiimdi tásilderdiń biri retinde «bir tereze» qaǵidaty boiynsha shaǵymdardy qabyldaýdyń Biryńǵai aqparattyq júiesi usynylady. Mundai júieni qurý tutynýshylardyń quqyǵyn qorǵaý boiynsha barlyq sharalardy bir jerde shoǵyrlandyrýǵa, shaǵymdy daiyndaý jáne ony quzyrly organdarǵa joldaý rásimderin jeńildetýge, sondai-aq, barlyq ótinishter men olardy qaraý nátijelerin tsifrlandyrýǵa múmkindik beredi», - dedi «Qazaqstan Respýblikasynyń keibir zańnamalyq aktilerine tutynýshylardyń quqyqtaryn qorǵaý máseleleri boiynsha ózgerister men tolyqtyrýlar engizý týraly» QR Zańynyń jobasyn tanystyrǵan ministr.
Baqyt Sultanovtyń atap ótýinshe, tutynýshylarǵa yńǵaily bolý úshin júiede daýdyń mánine jáne qyzmet kórsetý salasyna bailanysty shaǵymdardyń birqatar úlgilik formalary, sondai-aq daýlardy qaraityn sýbektilerdiń jáne memlekettik organdardyń tizbesi men bailanys aqparattary ornalastyrylady.
«Ekinshi kezekte, Tutynýshylardyń quqyqtaryn qorǵaý jónindegi vedomstvoaralyq keńes qurylatyn bolady, ol osy baǵyttaǵy kóteriletin máselelerdiń máni men mańyzdylyǵyn kúsheitedi, problemalyq normativtik quqyqtyq aktilerdi tez arada ózgertýge múmkindik beredi, memlekettik organdar qabyldaityn sheshimderdiń tiimdiligine tiisti baqylaýdy qamtamasyz etedi. Sonymen qatar, ýákiletti organǵa memlekettik baqylaý fýnktsiiasy beriledi. Bul tekseris jospardan tys baqylaý sýbektisine barmai profilaktikalyq túrde júzege asyrylady», - dedi Baqyt Sultanov.
