Erteń, iaǵni 7 qyrkúiekte saǵ 15.00-de Astanadaǵy QR Ulttyq akademiialyq kitaphanasynda Qazaqstan Respýblikasynyń eńbek sińirgen ǵylym qairatkeri, Halyqaralyq joǵary mektepter ǵylym akademiiasynyń qurmetti akademigi, Qazaqstan Jazýshylar Odaǵynyń Sáken Seifýllin atyndaǵy syilyǵynyń laýreaty, «Parasat» ordeniniń iegeri, filologiia ǵylymdarynyń doktory, professor Tursynbek Kákishevtiń jeke kitaphanasy «Ǵalym» zaly ashylady. Zaldyń ashylýy aiasynda «Maǵjan-Sáken»kitabynyń tusaýy kesiledi.
Is-sharaǵa QR Mádeniet jáne sport ministri Arystanbek Muhamediuly, QR Parlamenti Senaty men Májilisiniń depýtattary, elimizdiń ziialy qaýym ókilderi qatysady dep josparlanyp otyr.
2015 jyly ómirden ótken ǵalymnyń jeke kitaphanasynda gýmanitarlyq ǵylymdar boiynsha bes myńǵa jýyq kitap, sondai-aq belgili jazýshylar Sáken Seifýllin, Sábit Muqanovtardyń ómiri men qyzmetine qatysty qundy muraǵattyq qujattar bar. Ǵalymnyń qoljazbalary, muraǵattyq qujattary men basqa da materialdarynan quralǵan 83 papka qujat kitaphanaǵa syiǵa berilmek.
Ǵalym ádebi syn men qazaq ádebieti tarihyndaǵy ózekti máselelerdi zertteýge zor úles qosty. «Qazaq ádebietiniń tarihy» kóptomdyǵyn qurastyrýǵa da atsalysty. «Ónegeli adamdar ómiri» seriiasy boiynsha jaryq kórgen «Sáken Seifýllin» kitabynyń avtory.
Tursynbek Kákishevtiń jeke kitaphanasyn ǵalymnyń jubaiy, filologiia ǵylymdarynyń doktory, professor Kúlásh Sadyqqyzy Ahmet QR Ulttyq akademiialyq kitaphanasynyń qoryna tartý etti.
Kákishev kitaphanasyn óte úlken ári qory bai jeke kitaphanalardyń biri dep ataýǵa bolady. Kitaphanadan iesiniń óziniń iri tulǵa ekendigi – onyń entsiklopedizmi, keń oi-órisi, ynta-jigeri, tereń bilimdiligi kórinedi. Syiǵa tartylǵan týyndylar qatarynda arab tilindegi sirek basylymdar jáne latyn álipbiindegi qazaq balalar ádebieti, kórkem ádebietter, ádebiettaný, tarih, arhitektýra, óner, entsiklopediialar toptamalary, anyqtamalyqtar, otandyq jýrnaldar, antikalyq avtorlardyń kitaptary da kóptep tabylady, sondai-aq qyrǵyz, qytai jáne túrik tilderindegi týyndylar da kezdesedi.
Tursynbek Kákishevtiń kitaphanasy jańa «Ǵalym» zalynda ornalasqan. Jańa zal aqparattyq, mádeni jáne bilim berý mindetterin atqarady. Negizgi mindeti: paidalanýshylarǵa, sol qatarda zertteýshilerge, magistranttarǵa, ǵalymdarǵa aqparattyq-bibliografiialyq qyzmet kórsetý, mádeni-kópshilik is-sharalar ótkizý.
Ǵalym Tursynbek Kákishevtiń jeke kitaphanasynyń tabystalýy – QR Ulttyq akademiialyq kitaphanasynyń qoldanystaǵy dástúriniń jalǵasy, kitaphana qoryn baiyta túsýdegi mańyzdy qadam. Eskeretin jait, 2015 jyly QR Ulttyq akademiialyq kitaphanasynda «Myrzatai Joldasbekovtyń memorialdy kitap toptamasy» zaly ashylǵan bolatyn, atalǵan zalda akademik M. Joldasbekovtyń jeke kitaphanasy ornalasqan. 2016 jyly QR Memlekettik syilyǵynyń laýreaty, jazýshy Ákim Tarazi kitap toptamalaryn kitaphanaǵa syiǵa bergen-di, sondai-aq QR Memlekettik syilyǵynyń laýreaty, áigili jazýshy Dúkenbai Dosjannyń kitap toptamalaryn kitaphanaǵa jazýshynyń jubaiy Sáýle Dosjanova tartý etken edi.
"Ádebiet" portaly
