QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń kezekti otyry ótti. Jiyna turmystyq zorlyq-zombylyqtyń aldyn alý sharalary jáne otbasyn nyǵaitý jobalarynyń nátijeleri talqylandy, dep habarlaidy "Ult aqparat".
Jiynda komissiia tóraǵasy Lazzat Ramazanova Memleket basshysy Qasym-Jomart Toqaevtyń Qazaqstan halqyna Joldaýynda qoiylǵan mindetterge toqtaldy.
«Memleket basshysy eldegi otbasylyq-demografiialyq ahýal áli de mańyzdy alańdaýshylyq týǵyzyp otyrǵan másele ekenin atap ótti. Ulttyq komissiia otbasylyq jáne genderlik saiasat máselelerin júieli túrde sheshýdiń naqty mindetterin qoidy. Olardyń tiimdi júzege asyrylýy úshin barlyq múddeli memlekettik organdardyń jaýapkershiligi, kásibiligi jáne qyzyǵýshylyǵy qajet», - dedi Lazzat Ramazanova.
Sońǵy úsh jylda otbasylyq-turmystyq qatynastar salasyndaǵy quqyq buzýshylyqtardyń sany 2,5 esege artty (2017 j. - 445, 2018 j. - 919, 2019 j. - 1052). Jaǵdaidy biylǵy pandemiia men karantindik sharalar odan ári qiyndatty. Jyl basynan beri turmystyq quqyq buzýshylyq úshin 17 myńnan astam adam ákimshilik jaýapkershilikke tartyldy. 55 myńnan astam qorǵaý buiryqtary shyǵaryldy. 7 myńnan astam quqyq buzýshynyń tártibine qatysty arnaiy talaptar belgilendi.
Qazir Parlament Májilisi otbasylyq jáne turmystyq zorlyq-zombylyqqa qarsy is-qimyl týraly eki zań jobasyn qarastyrýda. Olar turmystyq zorlyq-zombylyqtyń aldyn-alý sýbektileriniń ókilettikterin, mindetteri men jaýapkershilikterin naqtylaýǵa, sondai-aq vedomstvoaralyq yntymaqtastyqty nyǵaitýǵa múmkindik beretini otyrysta atap ótildi.
Aqparat jáne qoǵamdyq damý minsitrliginiń ókilderi Ulttyq komissiiaǵa neke jáne otbasy institýtyn nyǵaitýǵa baǵyttalǵan áleýmettik jobalardyń nátijeleri týraly habarlady. 2019 jyly elimizdiń segiz oblysynda otbasylyq sottardyń janyndaǵy 12 «Baqytty otbasy» atty otbasylyq resýrstardy qoldaý ortalyqtary iske qosyldy. Ol jerden 2,5 myńnan astam adam psihologtyń, zańgerdiń, mediatordyń, meditsinalyq jáne áleýmettik qyzmetkerdiń, daǵdarys jaǵdaiyndaǵy mamannyń aqysyz keńesterin aldy. 2030 adam ajyrasý máseleleri boiynsha keńes aldy.
ÓNEGE jobasy aiasynda Qazaqstannyń toǵyz aimaǵyndaǵy áleýmettik qyzmetter 1125 konsýltatsiialyq qyzmet kórsetti jáne 225 qiyn ómirlik jaǵdaidaǵy otbasylarǵa qoldaý kórsetti. Alty myńnan astam maman men jastarǵa turmystyq zorlyq-zombylyqpen kúresý, otbasylyq ómirge daiyndyq, reprodýktivti densaýlyq máseleleri, balalar men jasóspirimder arasyndaǵy sýitsid pen buzaqylyqtyń aldyn alý boiynsha kýrstar ótkizildi. «Adam quqyqtaryn qorǵaýshy» jobasy aiasynda barlyq óńirlerde Jastar resýrstyq ortalyqtarynyń negizinde «Qorǵaý» zańgerlik keńes berý ortalyqtarynyń jumysy uiymdastyrylyp, ol jerden 19 myń adam aqysyz keńes alǵan.
Otyrys sońynda Lazzat Ramazanova memlekettik organdarǵa birqatar naqty usynystar berdi.
