Shymkent qalasy jáne Túrkistan oblysy boiynsha QAJ departamenti jedel bóliminiń qyzmetkerleri portativti kamerasy bar erekshe sálemdemeniń koloniia aýmaǵyna kirýiniń aldyn aldy, dep habarlaidy QazAqparat QR IIM Qylmystyq-atqarý júiesi komitetiniń telegram kanalyna silteme jasap.
Sottalǵandardyń biriniń atyna poshtamen kelgen banderoldi tekserý barysynda jasyryn mikro-beinebaqylaý kamerasy ornatylǵan kózildirik tárkilendi. Oqiǵa ornyna jedel-tergeý toby jetip, materialdar protsessýaldyq sheshim qabyldaýǵa joldandy.
«Jyl basynan beri Shymkent qalasy men Túrkistan oblysy boiynsha qylmystyq-atqarý júiesiniń qyzmetkerleri sálemdemeler men banderolder arqyly keletin tyiym salynǵan zattardy berýdiń 20-dan astam áreketiniń jolyn kesti. Kóbinese olar - esirtki zattary men uialy telefondar. Alaida, biz úshin mundai erekshe qurylǵynyń tárkilenýi alǵash ret bolyp otyr. Buǵan deiin óńirde osyǵan uqsas faktiler tirkelmegen», - deidi óńirlik QAJ departamenti.
«Tosyn syiy» bar sálemdeme aýyr jáne asa aýyr qylmystar (adam urlaý, bopsalaý, terrorizm) úshin 14 jylǵa sottalǵan jazasyn óteýshiniń atyna kelgen.
Departamenttiń málimdeýinshe, eskertýler men zańsyz is-áreketterge qarsy júrgiziletin sharalarǵa qaramastan, penitentsiarlyq mekemeniń aýmaǵynda paidalanýǵa tyiym salynǵan zattardyń túsýi toqtamai tur.
